उंडवडी : शेतात ट्रॅक्टरच्या साह्याने जमिनीचे सपाटीकरणाचे काम करत असताना चालकाचे ट्रॅक्टरवरील नियंत्रण सुटले. त्यानंतर ट्रॅक्टर पंचवीस फूट विहिरीत कोसळून चालकाचा जागीच दुर्दैवी मृत्यू झाला. ही घटना खराडेवाडी (ता. बारामती) येथे आज सकाळी आठच्या दरम्यान घडली. या घटनेत दिलीप गणपत भगत (वय 48)रा साबळेवाडी -भगतवाडी (ता. बारामती) असे मृत्यूमुखी पडलेल्या चालकाचे नाव आहे. 

साबळेवाडी - भगतवाडी येथील दिलीप भगत हे आज सकाळी साडे सातच्या दरम्यान खराडेवाडी हद्दीतील जाळीबुवा मंदीरानजिक गट 205 मध्ये शेतकरी राजेंद्र अर्जुन भापकर यांच्या शेतात जमिन सपाटीकरणाचे काम करण्यासाठी ट्रॅक्टर व औजार- फरांडी घेवून आले होते. यावेळी शेतात जमिन सपाटीकरणाचे काम सुरु झाल्यानंतर विहीरीलगत ट्रॅक्टर पाठीमागे घेत असताना भगत यांचे ट्रॅक्टरवरील नियंत्रण सुटल्याने ट्रॅक्टर पंचवीस फूट विहीरीत कोसळला. यामध्ये चालक भगत यांचा जागीच मृत्यू झाला.

काही वेळानंतर शेतकरी राजेंद्र भापकर शेतात आल्यानंतर त्यांना ही घटना समजली. घटनेनंतर ग्रामस्थांनी पोलिसांना माहिती दिली. पोलिसांनी घटनास्थळी येवून घटनेचा पंचनामा केला. यावेळी परिसरातील लोकांनी मोठी गर्दी केली होती. या घटनेमुळे परिसरात हळहळ व्यक्त होत आहे.