पुणे - ठेकेदाराने मजुरांकडे दुर्लक्ष केले. जेवण, अन्न-धान्यांची मदत न करता त्यांना वाऱ्यावर सोडले. मात्र, पोलिस, जिल्हा प्रशानाचे अधिकारी, कर्मचारी या मजुरांच्या मदतीला धावले. पोलिस आणि जिल्हा प्रशासनाचे कर्मचारी, अधिकारी आपला जीव धोक्यात घालून खडकवासला भागात अडकलेल्या परराज्यातील मजुरांना त्यांच्या राज्यात पाठविण्यासाठी दिवस-रात्र काम करीत आहेत. आज धायरी, नांदेड, किरकिटवाडी आदी खडकवासला भागातील सुमारे २५० मजुरांना नांदेड सिटी गेटपासून बसेसद्वारे पुणे स्टेशन येथे नेण्यात आले. तेथून त्यांना रेल्वेद्वारे मध्यप्रदेश येथे पाठविण्यात येणार आहे. 

ताज्या बातम्यांसाठी डाऊनलोड करा ई-सकाळचे ऍप

खडकवासला येथील मंडल अधिकारी रोहिदास जाधव म्हणाले,‘‘ सुमारे ३०० मजुरांना मध्य प्रदेशात पाठविण्याची कार्यवाही सुरू आहे. त्यातील काही आलेले आहेत. काही येत आहेत. त्यांना बसने पुणे स्टेशनला नेण्यात येईल. तेथून रेल्वेने मध्यप्रदेशात पाठविण्यात येईल. त्यांच्या जेवणाची पूर्ण काळजी घेतली आहे. शारीरिक अंतर राखण्याच्या नियमाचे काटेकोर पालन करण्यात येत आहे.’’ 

पुण्याच्या बातम्या वाचण्यासाठी येथे ► क्लिक करा

‘‘ पोलिस, जिल्हा प्रशासनाकडून थोडीफार मदत झाली. मात्र, जेथे काम करीत होतो, तेथील ठेकेदाराने आमच्याकडे दुर्लक्ष केले. जेवण, अन्न-धान्य काहीही दिले नाही. म्हणून गावी निघालो आहे,’’ अशी व्यथा एका मजूराने मांडली. तर, दुसरा एक जण म्हणाला, ‘‘ पोलिस आणि जिल्हा प्रशासनाकडून चांगली मदत झाली. मात्र, आता पैसे संपले आहेत, त्यामुळे गावी गेल्याशिवाय पर्याय नाही.’’