किरकटवाडी - सिंहगड रस्त्यावरील नांदेड फाट्याजवळ मसाज सेंटरच्या नावाखाली वेश्या व्यवसाय केला जात असल्याचे आढळून आले असून, हवेली पोलीसांच्या पथकाने संबंधित ठिकाणी छापा टाकून एकाला अटक केली आहे. शैलेश सर्जेराव देडे (वय 33, रा. फ्लॅट नं 204, महालक्ष्मी सोसायटी, कोल्हेवाडी, सिंहगड रोड, पुणे-24) असे अटक करण्यात आलेल्या मसाज सेंटर चालकाचे नाव आहे.

नांदेड फाट्याजवळील स्पर्श मसाज सेंटरमध्ये वेश्या व्यवसाय केला जात असल्याची माहिती हवेली पोलीस ठाण्याचे प्रभारी अधिकारी अनमोल मित्तल यांना मिळाली होती. त्यानुसार सदर ठिकाणी वेश्या व्यवसाय केला जात आहे का याची खातरजमा करण्यासाठी बनावट ग्राहक व सोबत एका पंचाला पाठविण्यात आले. यावेळी प्रभारी अधिकारी व इतर पोलीस कर्मचारी नांदेड फाट्याजवळ थांबून होते.

बनावट ग्राहक व पंचांनी मसाज सेंटरमध्ये अतिरिक्त पैसे घेऊन वेश्या व्यवसाय केला जात असल्याची माहिती पथकाला ठरल्याप्रमाणे मिस कॉल देऊन कळविल्यानंतर छापा टाकण्यात आला. पोलीसांनी मसाज सेंटरची तपासणी केली असता संशयास्पद वस्तू आढळून आल्या.

तसेच तेथे आढळून आलेल्या महिलेनेही मसाज सेंटर चालक अतिरिक्त पैशांचे आमिष दाखवून वेश्या व्यवसाय करण्यासाठी प्रवृत्त करत असल्याची कबुली दिली. त्यानुसार मसाज सेंटर चालक शैलेश सर्जेराव देडे याच्या विरोधात गुन्हा दाखल करून अटक करण्यात आली आहे. याबाबत प्रभारी अधिकारी अनमोल मित्तल अधिक तपास करत आहेत.