पुणे - राज्यात कोरोनाच्या ओमिक्रॉन या व्हेरिएंटचा नवीन उपप्रकार असलेल्या ‘बीए २.७५’चे ३२ रुग्ण आतापर्यंत आढळले आहेत. हे सर्व रुग्ण खडखडीत बरे झाले आहेत.

राज्यात जानेवारीमध्ये कोरोनाचा ओमिक्रॉन नवीन व्हेरिएंटचा उद्रेक झाला. यामुळे कोरोनाची तिसरी लाट राज्यात आली. डेल्टाच्या तुलनेत ओमिक्रॉनच्या उद्रेकात रुग्णांची संख्या झपाट्याने वाढत होती. मात्र, त्यात रुग्णांना उपचारासाठी रुग्णालयात दाखल करावे लागत नव्हते, हा मोठा दिलासा यातून मिळाला. या पार्श्वभूमीवर ओमिक्रॉनच्या व्हेरिएंटमध्ये अजून उपप्रकार दिसून येत आहेत. त्यात ‘बीए. २’ हा सहजतेने दिसत आहे. मात्र, त्यानंतर गेल्या काही महिन्यांमध्ये ‘बीए. ४’ आणि ‘बीए. ५’ हे नवीन उपप्रकार आढळून आले. त्या पाठोपाठ आता ‘बीए. २.७५’ हा उपप्रकार दिसून आला.

राज्यात ‘बीए. ४’ आणि ‘बीए. ५’ या व्हेरिएंटचे ६ रुग्ण आणि ‘बीए. २.७५’ चे ३ रुग्ण गेल्या चोवीस तासांमध्ये आढळून आले. पुण्यातील बी. जे. वैद्यकीय महाविद्यालयाने दिलेल्या ताज्या अहवालानुसार राज्यात ‘बीए. ४’चे २ तर ‘बीए. ५’ चे ४ रुग्ण आढळले आहेत. या शिवाय ‘बीए. २.७५’ या व्हेरिएंटचेदेखील ३ रुग्ण आढळले आहेत. हे सर्व रुग्ण पुण्यातील आहेत.

हे सर्व नमुने ३१ मे ते ५ जुलै २०२२ या दरम्यान पुणे, नगर, सिंधुदुर्ग आणि सोलापूर जिल्ह्यातील नमुने तपासण्यासाठी घेण्यात आले. त्यातून या रुग्णांमध्ये हे उपप्रकार आढळले आहेत. हे सर्व घरगुती विलगीकरणात बरे झाले आहेत, अशी माहिती राज्याच्या सार्वजनिक आरोग्य खात्यातर्फे कळविण्यात आली. यामुळे राज्यात आतापर्यंत आढळलेल्या बीए. ४ आणि बीए. ५ रुग्णांची संख्या ७९ तर बीए. २.७५ रुग्णांची संख्या ३२ झाली आहे, असेही खात्याने सांगितले.