पुणे : महापालिकेच्या (Pune corporation) मध्यवर्ती भांडार विभागाच्या स्टेशनरी खरेदीच्या निविदेतील घोळ वाढतच चालला आहे. निविदा पूर्व बैठक घेणे, निविदा भरलेल्या सर्व ठेकेदारांसमोरच सॅम्पल उघडणे यासह विविध नियमांना फाटा दिल्याची माहिती समोर आली आहे. (pune corporation Break the rules preferred contractor)

महापालिकेच्या क्षेत्रीय कार्यालयांना स्टेशनरी पुरविण्यासाठी सुमारे ६६ लाख रुपयांची निविदा मध्यवर्ती भांडार विभागाकडून काढण्यात आली आहे. त्यात झालेला गैरप्रकार ‘सकाळ’ने गुरुवारी सर्वप्रथम उघडकीस आणला. त्यातून अनेक गोष्टी समोर येऊ लागल्या आहेत. नियमानुसार निविदा उघडण्यापूर्वी सर्व ठेकेदारांची निविदा पूर्व (प्री बिड मिटींग) बैठक घेतली जाते. ती खात्याकडून घेण्यात आली नाही. तसेच ज्या ठेकेदारांनी निविदा भरल्या आहेत, त्या सर्व ठेकेदारांच्या समोर सॅम्पल उघडणे कायद्याने अपेक्षित आहे. परंतु, तसे न करता मर्जीतील एकाच ठेकेदाराच्या समोर त्या उघडण्यात आल्या.

जेणेकरून अन्य ठेकेदारांना अपात्र करणे शक्य व्हावे. याशिवाय, आर्थिक आणि टेक्निकल अशी दोन्ही पाकिटे ओपन केल्यानंतर सर्व ठेकेदारांना कागदपत्रे खुली झाली पाहिजेत. मात्र, ‘एओसी’ ओपन करण्यात आली नाही. त्यामुळे ठेकेदारांना कोणतीही माहिती मिळू नये, असे प्रकार केल्याचे समोर आले आहेत.

वस्तूंमध्ये मोठी तफावत

स्टेशनरी खरेदी करताना निविदेत दिलेल्या अटी आणि प्रत्यक्षात महापालिकेला पुरविण्यात येणाऱ्या वस्तू, यांच्यामध्ये मोठी तफावत असल्याचे खात्यातील काही अधिकाऱ्यांनी सांगितले. त्यामुळेच अटी-शर्तीमध्ये वस्तूचे चुकीचे स्पेसिफिकेशन टाकून अन्य ठेकेदार कंपन्यांना बाद करायचे आणि मर्जीतील ठेकेदाराला काम मिळण्यासाठी बदल करणे. त्यानुसार पुरवठा झाला नाही, तरी गप्प राहायचे, असे प्रकार सर्रासपणे केले जात असल्याचे काही कर्मचाऱ्यांनी सांगितले.