धायरी : काम संपल्यानंतर दुचाकीवर घरी जात असलेल्या गारवा बिर्याणीच्या मॅनेजरचा डोक्यावर वार करुन त्यांचा खून करण्यात आला. चोरीच्या उद्देशाने हा हल्ला झाला नाही हल्लेखोरांचा नेमका उद्देश अद्याप स्पष्ट झाला नाही. मात्र अपरात्री सुरु राहणारी हाॅटेल्स आणि धिंगाणा घालणारी टोळकी यांच्यावर पोलिसांच्या गस्तीचा कसलाही धाक राहिला नसल्याचे स्पष्ट झाले आहे. अशा प्रकारच्या ४/५घटना गेल्या काही काळात झाल्याचे दिसून येते.

भरत भगवान कदम (वय २४, रा. धायरेश्वर प्राईड, मतेनगर, धायरी) असे खून झालेल्याचे नाव आहे. याप्रकरणी त्यांचा भाऊ प्रकाश भगवान कदम यांनी सिंहगड रोड पोलीस ठाण्यात फिर्याद दिली आहे.

भरत कदम हे गारवा बिर्याणी येथे मॅनेजर म्हणून काम करत होते. शनिवारी रात्री काम संपल्यानंतर ते दुचाकीवरुन घरी जात होते. यावेळी धायरेश्वर मंदिर ते पारी कंपनी चौक रस्त्यावरील निर्मिती असोसिएटस बिल्डिंगच्या समोरील गायकवाड यांच्या रिकामे प्लॉट येथे हल्लेखोरांनी भरत कदम यांना अडविले. तीक्ष्ण हत्याराने त्यांच्या डोक्यात वार केले. त्यात ते तेथेच जखमी अवस्थेत पडले. नऱ्हे धायरी परिसरातील नागरिकांमध्ये भीतीचे वातावरण निर्माण झाले आहे.

याबाबत पोलीस निरीक्षक जयंत राजुरकर यांनी दिलेल्या माहितीनुसार, हल्लेखोर पळून गेले. या घटनेची माहिती गस्तीवरचे पोलीस, मार्शल यांना मध्यरात्री साडेबारा वाजण्याच्या सुमारास मिळाली. सिंहगड रोड पोलिसांनी तातडीने घटनास्थळी जाऊन पाहणी केली.

तेव्हा भरत कदम यांचा मृत्यु झाल्याचे दिसून आले. तेथेच त्यांच्याजवळ त्यांची दुचाकी मिळून आली. तसेच त्यांच्या खिशातील पैसे, पाकिट व अन्य साहित्यही तसेच होते. त्यामुळे चोरीच्या उद्देशाने हा हल्ला झाला नसल्याचा प्राथमिक अंदाज आहे. भरत कदम यांच्या खुनामागील नेमके कारण काय याचा शोध सुरू आहे.

सिंहगड रोड पोलिस ठाण्यातील अधिकारी आणि सहायक पोलिस आयुक्त सुनिल पवार यांनी घटनास्थळी भेट दिली.तसेच साह्ययक पोलीस निरीक्षक दीपक कादमाणे, पोलीस उपनिरीक्षक निकेतन निंबाळकर, खडके आदी अधिकाऱ्यांनी घटनास्थळी धाव घेतली.