किरकटवाडी - सिंहगड किल्ला, डोणजे व आजुबाजूच्या परिसरात संचारबंदी असताना सिंहगड किल्ल्याच्या पायथ्याशी गोळेवाडी येथे सानवी रिसॉर्टमध्ये सुरू असलेल्या डान्सपार्टीवर पुणे ग्रामीण पोलिसांच्या स्थानिक गुन्हे शाखेच्या पथकाने छापा टाकून हॉटेल मालकासह सहा पुरुष व चार महिलांवर गुन्हा दाखल केला आहे. यामध्ये हॉटेल मालकाचा मित्र असलेला व आंबेगाव कात्रज परिसरात मोठे हॉस्पिटल असलेला डॉक्टर पळून जाण्यात यशस्वी झाला आहे.

याप्रकरणी हॉटेल मालक विनय सुभाष कांबळे (वय-32, रा. आकाशनगर,वारजे.), संदिप शंकर कोतवाल (वय-47, रा. हिंगणे मळा, हडपसर), सचिन विठ्ठल शिंदे (वय-38, रा.आनंदनगर, सिंहगड रोड.) कालिदास शशिराव काकडे (वय-50, रा. संस्कृती सोसायटी, हडपसर.), विठ्ठल विजय मोरे (वय-43, रा. साईनगर, हडपसर.), राजेश बलभीम वाघमारे (वय-45, रा.ससाणेनगर, हडपसर.) यांच्यासह चार महिलांवर जिल्हाधिकाऱ्यांच्या आदेशाचा भंग केल्याप्रकरणी हवेली पोलीस ठाण्यात गुन्हा दाखल करण्यात आला आहे.

स्थानिक गुन्हे शाखेचे पोलीस शिपाई अमोल शेडगे यांना सिंहगडाच्या पायथ्याशी गोळेवाडी येथील सानवी रिसॉर्टमध्ये जिल्हाधिकाऱ्यांच्या आदेशाचा भंग करुन डान्सपार्टी सुरू असल्याची माहिती मिळाली. त्यानुसार स्थानिक गुन्हे शाखेचे पोलीस निरीक्षक पद्माकर घनवट यांच्या मार्गदर्शनाखाली सहाय्यक पोलीस निरीक्षक नेताजी गंधारे, पोलीस हवालदार ज्ञानेश्वर क्षिरसागर, हनुमंत पासलकर, महिला पोलीस हवालदार नंदा कदम, पोलीस शिपाई मंगेश भगत, अमोल शेडगे यांच्या पथकाने दि. 24 जुलै रोजी रात्री उशिरा ही कारवाई केली.

डॉक्टर फरार कसा झाला? गुन्हाही दाखल नाही

डान्स पार्टीत सहभागी असलेला व पार्टीच्या मुख्य सुत्रधारांपैकी एक डॉ. निखिल भाकरे हा पोलीस आल्यानंतर अंधाराचा फायदा घेऊन फरार झाल्याचे फिर्यादीत नमूद करण्यात आले आहे मात्र असे असताना सदर डॉक्टरवर गुन्हा दाखल करण्यात आलेला नाही. त्यामुळे पोलीसांकडूनच या डॉक्टरला वाचविण्याचा प्रयत्न झाला आहे का? असा प्रश्न उपस्थित होत आहे.