पुणे - चोरट्यांनी बॅंकेचे एटीएम मशिन उचकटून चोरीचा प्रयत्न केल्याची घटना शहराच्या मध्यवर्ती भागात अप्पा बळवंत चौकापासून काही अंतरावर घडली. या प्रकरणी विश्रामबाग पोलिसांनी उत्तरप्रदेशातील टोळीतील चार जणांना अटक केली आहे.

याबाबत सुरक्षा एजन्सीचे व्यवस्थापक मनैय्या टणकेदार (वय २३, रा. शिवणे) यांनी विश्रामबाग पोलिस ठाण्यात फिर्याद दिली आहे. तर आशिष हरिकेश विश्वकर्मा (वय ३०), नायब लालचंद पटेल (वय २८), मनीष मुन्ना पांडे (वय ३१) आणि कमल राजकुमार विश्वकर्मा (वय २२, सर्व रा. प्रतापगड, उत्तर प्रदेश) अशी अटक केलेल्यांची नावे आहेत.

पोलिसांनी दिलेल्या माहितीनुसार, शनिवारवाडा आणि अप्पा बळवंत चौकादरम्यान खासगी बँकेचे एटीएम आहे. चोरट्यांनी मंगळवारी या एटीएममधून रोकड चोरी केली. तसेच अन्य एका एटीएममध्ये तोडफोड करून रोकड चोरण्याचा प्रयत्न केला. याबाबत माहिती मिळताच विश्रामबाग पोलिसांनी तपास करून चोरट्यांना बेड्या ठोकल्या. पुढील तपास पोलिस उपनिरीक्षक मनोज बरुरे करीत आहेत.