पुणे : महिलेसमवेतच्या प्रेमसंबंधातून आत्महत्या केल्या संशयातुन आत्महत्या (Suicide) करणाऱ्याच्या भावाने त्याच्या साथीदाराच्या मदतीने महिलेच्या 20 वर्षीय मुलाचे शनिवारी रात्री कल्याणीनगर येथून अपहरण केले. दरम्यान, हा प्रकार येरवडा पोलिसांना समजल्यानंतर काही तासातच पोलिसांनी आरोपींचा माग काढून तरुणाची पेरणे फाटा येथून सुटका केली, तसेच पाच जणांना बेड्या ठोकल्या. न्यायालयाने संशयित आरोपींना 18 जानेवारीपर्यंत पोलिस कोठडी सुनावली आहे. (Pune Crime News)

विजय राम गेचंद (वय 31), अजय रानबा हावळे (वय 21), विकास आनंद भंडारी (वय 30), जमीर करीम शेख (वय 19) व सुरज गंगाराम मौर्य (वय 26, सर्व रा. राजीव गांधीनगर, येरवडा) अशी अटक केलेल्या संशयित आरोपींची नावे आहेत. याप्रकरणी 38 वर्षीय महिलेने येरवडा पोलिस ठाण्यात फिर्याद दिली होती. फिर्यादी महिलेचे आरोपी विजय गेचंद याचा भाऊ सनी गेचंद याच्यासमवेत प्रेमसंबंध होते.

दरम्यान, सनीने काही दिवसांपुर्वी आत्महत्या केली होती. आपल्या भावाने संबंधित महिलेमुळेच आत्महत्या केली, असा विजय गेचंद याला संशय होता. त्यातुनच त्याने भावाच्या मृत्यूचा बदला घेण्यासाठी इतर चार साथीदारांसमवेत फिर्यादीच्या मुलाचे अपहरण करण्याचा कट रचला. त्यानुसार, संबंधित तरुणाचे तो कामाला असलेल्या कल्याणीनगर येथील ठिकाणावरून शनिवारी रात्री साडे अकवा वाजता अपहरण केले.

मुलगा बराच वेळ घरी न आल्याने आईने पोलिस ठाणे गाठून फिर्याद दिली. त्यानंतर घटनेचे गांभीर्य ओळघून अपर पोलिस आयुक्त नामदेव चव्हाण, परिमंडळ चारचे पोलिस उपायुक्त रोहिदास पवार, सहाय्यक पोलिस आयुक्त किशोर जाधव, पोलिस निरीक्षक (गुन्हे) विजयसिंग चव्हाण यांच्या मार्गदर्शनाखाली तीन पथके तयार करुन तपासासाठी पाठविण्यात आली. त्यानुसार, एका पथकास अपहरण केलेल्या तरुणाला लोणीकंद पोलिस ठाण्याच्या हद्दीत नेल्याची खबर मिळाली. त्यानुसार, पथकाने पेरणे फाटा येथे अपहरणकर्त्यांच्या कारला गाठले. त्यानंतर पोलिसांनी त्यांच्या तावडीतुन तरुणाची सुटका केली. त्यानंतर पाच आरोपींना अटक केली.