पुणे : दहावी आणि बारावीच्या निकालांनतर विद्यार्थ्यांना प्रवेशासाठी लागणारे विविध दाखले मुदतीत वितरित करण्यासाठी जिल्हा प्रशासनाने तयारी केली आहे. यातील वशिलेबाजी रोखण्यासाठी जिल्हा प्रशासनाने नव्या संगणक प्रणालीचा वापर सुरु केला आहे. त्यानुसार ‘प्रथम येणाऱ्यास प्राधान्य’ (फर्स्ट कम फर्स्ट सर्व्ह) या तत्त्वावर दाखले दिले जातील. त्यामुळे अर्ज ज्या क्रमाने आले त्याच क्रमाने ऑनलाइन दाखले दिले जातील.

पुणे शहर तहसिल कार्यालयाच्या अखत्यारीत सुमारे ५२ महा ई सेवा केंद्रे आहेत. सीबीएसई आणि आयसीएसईसह महाराष्ट्र बोर्डाचेही दहावी-बारावीचे निकाल जाहीर झाले आहेत. प्रवेशप्रक्रियेसाठी लागणाऱ्या दाखल्यांसाठी नागरिकांची गर्दी होते. एकाच वेळी असंख्य अर्ज येत असल्याने प्रशासनाला दाखले देण्यासाठी तारेवरची कसरत करावी लागते.

यातून नागरिक आणि शासकीय कर्मचाऱ्यांत वादावादी होते. अर्ज करताना नागरिकांना बराच वेळ रांगेत उभे राहावे लागते. अर्जात त्रुटी असल्यास हेलपाटे मारावे लागतात. प्रवेशप्रक्रियेच्या कालावधीत दाखला मिळाला नाही तर विद्यार्थ्यांचे नुकसान होण्याचा धोका असतो. विद्यार्थ्यांना दाखल्यांसाठी नागरी सुविधा केंद्रांत हेलपाटे मारावे लागू नयेत म्हणून ऑनलाइन दाखले दिले जातात.

प्रवेशासाठी उत्पन्नाचा दाखला, रहिवासी दाखला, नॉन क्रिमिलेयर, जातीचा दाखला आदी ऑनलाइन देण्यास प्रशासनाचे प्राधान्य आहे. त्यासाठी सेतू केंद्रात न जाता विद्यार्थ्यांना घराजवळील महा ई सेवा केंद्रात अर्ज करता येणार आहे. तसेच ‘आपले सरकार'' पोर्टलवरून अर्ज करावेत, असे आवाहन प्रशासनाने केले.

उत्पन्नाचा दाखला

अर्ज, स्वघोषणापत्र, फोटो, आधारकार्ड, पत्त्याच्या पुराव्यासाठी विजेचे बिल, करपावती, रेशनकार्ड यापैकी एक, फॉर्म १६ किंवा तलाठ्याकडील उत्पन्नाचा दाखला.

वय-राष्ट्रीयत्व अधिवास दाखला

स्वघोषणापत्र, आधारकार्ड, फोटो, विद्यार्थ्याचा शाळा सोडल्याचा दाखला, तसेच वडिलांचा शाळा सोडल्याचा दाखला किंवा जन्म दाखला, महाराष्ट्रातील सलग १५ वर्षे वर्षाचे रहिवास पुराव्यासाठी रेशनकार्ड विजेचे बिल अथवा महापालिकेची करपावती.