पुणे- जिल्ह्यात पहिल्या टप्प्यात फक्त आरोग्य कर्मचाऱ्यांनाच कोरोनाची लस दिली जाणार आहे. याबाबतचा निर्णय सोमवारी (ता.७) जिल्हा कृती दलाच्या बैठकीत घेण्यात आला आहे. या कृती दलाची  पहिलीच बैठक झाली आहे.

केंद्र सरकारकडून लवकरच ही लस उपलब्ध होणार आहे. या पार्श्वभूमीवर या लसीकरणाच्या अंमलबजावणीसाठी जिल्हास्तरावर जिल्हाधिकारी डॉ. राजेश देशमुख यांच्या अध्यक्षतेखाली जिल्हा कृती दल स्थापन करण्यात आले आहे. या समितीने १२ डिसेंबरच्या आत कोरोनाच्या संभाव्य लसिकरणाचे नियोजन करण्याचा आदेश राज्य सरकारने दिला होता. 

गुजरातमध्ये होणार नाही 'भारत बंद', जबरदस्ती केल्यास कठोर कारवाई-...

पहिल्या टप्प्यात सरकारी आणि खासगी रुग्णालयातील आरोग्य कर्मचाऱ्यांना २८ दिवसांच्या फरकाने या लसीचे प्रत्येकी दोन डोस दिले जाणार आहेत. याबाबतचा कृती आराखडा जिल्हा आरोग्य विभागाने तयार केला आहे. यानुसार पहिल्या टप्प्यात ३१ हजार ९१५ कर्मचाऱ्यांना याचा लाभ होणार आहे. या कर्मचाऱ्यांमध्ये वैद्यकीय अधिकारी, पर्यवेक्षिका, परिचारिका आणि आरोग्य विभागातील लेखनिक, वॉर्ड बॉय आदी कर्मचाऱ्यांचा समावेश असणार आहे. 

सीव्हीबीएमएस पोर्टल विकसीत

केंद्र सरकारने या लसीकरणाच्या नियोजनासाठी कोवीड व्हॅक्सीनेशन बेनिफिशिअरी मॅनेजमेंट सिस्टीम (सीव्हीबीएमएस) हे संकेतस्थळ कार्यान्वित करण्यात आले आहे. या संकेतस्थळावर लसीकरणाचा लाभ दिला जाणाऱ्या आरोग्य संस्था आणि कर्मचाऱ्यांची माहिती उपलब्ध असणार आहे.