कात्रज : पुणे जिल्हा दूध उत्पादक संघाची सन २०२२-२०२७च्या नवनिर्वाचित संचालक मंडळाची निवडणुक नुकतीच पार पडली. निवडणुक निर्णय अधिकारी तथा विभागीय उपनिबंधक मिलिंद सोबले यांचे अध्यक्षतेखाली झालेल्या संचालक मंडळाच्या बैठकीत जिल्ह्यातील महिला राखीव मतदार संघातून निवड झालेल्या केशर पवार यांची संघाच्या अध्यक्षपदी एकमताने निवड करण्यात आली आहे.

संघाच्या त्या पहिला महिला अध्यक्ष आहेत. तर उपाध्यक्षपदी दौंड तालुका मतदार संघामधून निवडून आलेल्या राहुल दिवेकर यांची एकमताने निवड करण्यात आली. नवनिर्वाचित अध्यक्ष केशर पवार यापूर्वी १९९८ पासून संघावर संचालक म्हणून काम करत आहेत. २०१४ ते २०१५ या कालावधीत त्या संघाच्या उपाध्यक्षाही राहिलेल्या आहेत. राहुल दिवेकर हे प्रथमच संघाचे संचालक मंडळावर निवडून आलेले असून त्यांची उपाध्यक्षपदी वर्णी लागली आहे.