पुणे - भरधाव मोटारीने एकामागून एक आठ वाहनांना पाठीमागून जोरात धडक दिली. ही घटना शिवाजीनगर येक्षील एलआयसी इमारतीसमोर रस्त्यावर बुधवारी रात्री घडली. या अपघातात चारजण किरकोळ जखमी झाले आहेत. शिवाजीनगर पोलिसांनी वाहनचालकाला ताब्यात घेतले आहे.

या संदर्भात पोलिसांनी दिलेल्या माहितीनुसार, खासगी प्रवासी वाहतूक करणारा मोटारचालक रात्री पावणेआठच्या सुमारास संचेती हॉस्पिटलच्या दिशेने भरधाव जात होता. या मोटारीने चार दुचाकीस्वार आणि चार मोटारींना पाठीमागून जोरात धडक दिली. त्यात चारजण जखमी झाले असून, त्यांना रुग्णालयात दाखल करण्यात आले आहे.

‘ड्रंक ॲन्ड ड्राइव्ह’मधून हा अपघात घडल्याचा पोलिसांचा अंदाज आहे. पोलिसांनी मोटारचालकाला ताब्यात घेतले असून, त्याची वैद्यकीय तपासणी करण्यात येणार असल्याची माहिती पोलिसांनी दिली. याप्रकरणी रात्री उशिरापर्यंत गुन्हा दाखल करण्याची प्रक्रिया सुरू होती.