‘म्हाडा’ पुणे मंडळाच्या
सदनिकांसाठी उद्या सोडत

सकाळ वृत्तसेवा
मुंबई, ता. २३ : ‘म्हाडा’च्या पुणे येथील ताथवडे टप्पा-२ गृहनिर्माण योजनेअंतर्गत अल्प उत्पन्न गटातील २४ आणि मध्यम उत्पन्न गटातील ७६८ सदनिका अशा एकूण ७९२ सदनिकांच्या विक्रीसाठी लाॅटरी जाहीर केली होती. त्यानुसार आलेल्या १,४२२ अर्जांची गुरुवारी (ता. २५) दुपारी १२.३० वाजता संगणकीय सोडत काढली जाणार आहे. पुणे मंडळाचे सभापती शिवाजीराव आढळराव पाटील यांच्या हस्ते मंडळाच्या कार्यालयातील भारतरत्न डॉ. बाबासाहेब आंबेडकर सभागृहात सोडत काढण्यात येणार आहे. पुणे गृहनिर्माण व क्षेत्रविकास मंडळातर्फे ताथवडे पुणे टप्पा-२ गृहनिर्माण योजनेअंतर्गत २४ सदनिका अल्प उत्पन्न गटासाठी उपलब्ध करून देण्यात आल्या आहेत. प्रति सदनिकेची किंमत ४६ ते ४७ लाख रुपयांदरम्यान असून, बांधकामाचे क्षेत्रफळ ७५.९६ ते ७७.९९ चौरस मीटर आहे. याच प्रकल्पात मध्यम उत्पन्न गट योजनेअंतर्गत ७६८ सदनिका असून, प्रति सदनिकेची किंमत ६४.५० ते ६५.५० लाख रुपयांदरम्यान आहे व बांधकामाचे क्षेत्रफळ ८९.१५ ते ९१.१८ चौरस मीटर आहे.