केडगाव : केडगाव ( ता.दौंड ) येथील प्रांजली सोमा पिसे हिची १५ वर्षाखालील क्रिकेट संघात बीसीसीआयने निवड केली आहे. महाराष्ट्र संघासाठी प्रांजलीची निवड झाली आहे. एक दिवसीय साखळी क्रिकेट स्पर्धा रांची ( झारखंड ) व जयपूर ( राजस्थान ) येथे सुरू आहेत. रणजी संघाचे माजी कर्णधार निखील पराडकर हे प्रांजलीचे प्रशिक्षक आहेत.

गेल्या तीन वर्षापासून पराडकर हे प्रांजलीला प्रशिक्षण देत आहे. डी.वाय. पाटील महाविद्यालयात झालेल्या १५ वर्षाखालील स्पर्धेत उपांत्य फेरीत प्रांजली सामनावीर ठरली आहे. बी.व्ही. राव स्मृती करंडक स्पर्धेत युथ स्पोटर्स क्लबला विजय मिळवून दिल्याने प्रांजलीला सामनावीर म्हणून गौरविले आहे. मास्टर्स क्रिकेट स्पर्धेत प्राजंलीने ३४ धावा देत ५ फलंदाज बाद केले आहेत. या कामगिरीमुळे प्रांजली सामनावीर ठरली.

प्रांजली बोरीपार्धी ( ता.दौंड ) येथील समाजसेवक शिवाजीराव जेधे विद्यालयात नववीच्या वर्गात शिकत आहे. प्रांजली गेल्या तीन वर्षापासून सरावासाठी केडगाव ते पुणे येथे रोज प्रवास करत आहे. प्रांजलीच्या निवडीबद्दल तीचे परिसरात कौतुक होत आहे.

या यशाबद्दल प्रांजली म्हणाली, ''बीसीसीआयकडून महाराष्ट्र संघासाठी माझी निवड होईल हे अपेक्षित होते. भारतासाठी खेळायचे आणि विजेतेपद मिळवायचे हे स्वप्न आहे. गेली तीन वर्ष मी रोज सकाळ, दुपार, सायंकाळी एकूण आठ तास सराव करते. माझे वडील सोमा पिसे व माझे प्रशिक्षक निखील पराडकर यांनी माझ्यासाठी खूप मेहनत घेतली आहे.''