पुणे - कनिष्ठ महाविद्यालयात घुसून टोळक्‍याने अल्पवयीन मुलाचे अपहरण करुन त्याचे विवस्त्र फोटो काढून त्याच्याकडे भांडण झालेल्या मुलांना घेऊन येण्याची धमकी दिल्याचा धक्कादायक प्रकार उघडकीस आला आहे. हि घटना गुरुवारी दुपारी दत्तवाडी परिसरात घडली. याप्रकरणी दत्तवाडी पोलिसांनी चार अल्पवयीन मुलांसह काही जणांना ताब्यात घेतले आहे.

याप्रकरणी पिडीत मुलाच्या वडिलांनी दत्तवाडी पोलिस ठाण्यात फिर्याद दिली आहे. पोलिसांनी ताब्यात घेतलेल्या एका अल्पवयीन मुलावर खुनाच्या प्रयत्नाचा गुन्हा दाखल आहे.

पोलिसांनी दिलेल्या माहितीनुसार, पिडीत मुलगा एका कनिष्ठ महाविद्यालयात 11 वीमध्ये शिक्षण घेत आहे. बुधवारी संबंधित मुलगा घरी जात असताना तळजाई येथे दोन गटांमध्ये भांडणे सुरु होती. तेव्हा, पिडीत मुलगा हा तेथे त्यांची भांडणे पाहत थांबला होता.

संबंधित मुलानेच आपल्याला मारण्यासाठी मुले पाठविल्याचा समज झाला. त्या रागातुनच त्यानी गुरुवारी दुपारी संशयित पिडीत मुलाच्या महाविद्यालयात गेले. तेथुन त्यांनी पिडीत मुलाला त्यांच्या दुचाकीवर जबरदस्तीने बसवून आंबेगाव परिसरातील एका पत्र्याच्या शेडमध्ये नेले. तेथे आरोपींनी पिडीत मुलाला बुधवारी झालेल्या भांडणातील मुलांना घेऊन ये, असा दमदाटी केली. तसेच त्याच्या गळ्याला धारदार शस्त्र लावून त्यास जीवे मारण्याची धमकी दिली. तेवढ्यावरच न थांबता, त्यास विवस्त्र करुन त्याची छायाचित्रे काढली.