उंड्री : कृषी उत्पन्न बाजार समितीच्या निवडणुका घेण्याचा निर्णय सरकारने घेतला नाही, तर न्यायालयाने निकाल दिला आहे. कोणत्याही परिस्थितीमध्ये बाजार समितीच्या निवडणुका महाविकास आघाडी जिंकणार असा विश्वास राष्ट्रवादीचे जिल्हाध्यक्ष प्रदीप गारटकर यांनी व्यक्त केला.

राष्ट्रवादी काँग्रेस पक्षाच्या वतीने कृषी उत्पन्न बाजार समिती निवडणूक आणि हवेली तालुका राष्ट्रवादी कार्यकर्त्यांची आढावा बैठक हांडवाडी (ता. हवेली) येथे झाली. याप्रसंगी आमदार अशोक पवार, माजी आमदार जगन्नाथ शेवाळे, पीडीसीसीचे संचालक सुरेश घुले, विकास दांगट, राजेंद्र खांदवे, माणिक गोते, हवेलीचे माजी उपसभापती सचिन घुले उपस्थित होते.

दरम्यान, आमदार अशोक पवार म्हणाले की, शिरुर, पुरंदर, हवेली तालुक्यातून राष्ट्रवादी काँग्रेस महाविकास आघाडीतील घटक पक्षांना सोबत घेऊन ही निवडणूक जिंकणारच. तिन्ही तालुक्यात १४० विविध विकास कार्यकारी सोसायट्या असून, त्यातील ९० टक्के सोसायट्यांवर राष्ट्रवादी व मविआचे वर्चस्व आहे, असे त्यांनी सांगितले.भरत झांबरे, दिलीप वाल्हेकर, त्रिबंक मोकाशी यांनी कार्यक्रम यशस्वी करण्यासाठी प्रयत्न केले.