मंचर : येथील बसस्थानकासमोर, ‘मी पंडित आहे, तुम्हाला जादू दाखवतो,’ असे सांगून हातचलाखी करून ११ हजार ८०० रुपये किमतीचा मोबाईल चोरून पळून जाताना मंचर पोलिसांनी पाठलाग करून जावेद अगाजित मदारी (वय १९, रा. इस्लामपुरा, ता. शिरूर) व शाहरुख मदारी या दोन चोरट्यांना पकडले.

याबाबत मंचर पोलिस ठाण्याचे पोलिस निरीक्षक सतीश होडगर यांनी माहिती दिली की, अक्षय लांघी (रा. आहुपे ता. आंबेगाव) हे त्यांच्या मित्राबरोबर चाकण येथून मंचर येथे आले होते. बसस्थानकावर त्यांना दोन जण भेटले. त्यांनी, ‘आम्ही पंडित आहे. तुम्हाला जादू दाखवतो,’ असे म्हणून खडा घेऊन यायला सांगितले.

त्यानुसार लांघी यांनी खडा आणून दिला. मात्र, अजित व शाहरुख या दोघांनी हातचलाखी करून अक्षय यांचा मोबाईल काढून घेतला. ‘तू जर ऐकले नाही तर तुझ्या घरच्यांचे बरे वाईट होईल,’ अशी दमाची भाषाही वापरली. त्यानंतर अक्षय यांच्या पिशवीमध्ये मोबाईल टाकल्याचा बहाणा करत ते तेथून निघून गेले. अक्षय यांनी पिशवीत पाहिले असता मोबाईल दिसला नाही. अक्षय यांनी आजूबाजूला पाहिले. त्यावेळी अजित व शाहरुख पळताना दिसले. अक्षय व त्याचा मित्राने वाहतूक पोलिसांना या प्रकाराची माहिती दिली.

पोलिसांनी पाठलाग करून दोन्ही चोरट्यांना जेरबंद केले आहे. याबाबत अक्षय लांघी यांनी मंचर पोलिस ठाण्यात चोरट्यांच्या विरोधात फिर्याद दिली आहे. पुढील तपास पोलिस उपनिरीक्षक रावसाहेब बांबळे करत आहेत.