पर्वती (पुणे) : सह्याद्री मैदानाच्या कडेच्या इमारतीखाली सांडपाणी वाहिनी गळतीमुळे सह्याद्री मैदानाची दूरावस्था झालेली होती. मैदानावर चिखल साचत होता. मैदानावर सकाळी मुले खेळायला आणि नागरिक व्यायामासाठी येत असतात. त्यांना अडथळा येत होता. या सांडपाणी वाहिनी मागील दोन महिन्यांपासून फुटली होती. यामुळे शेजारील इमारतीसाठी मैदानाच्या कोपऱ्यात डबके साचले होते. 

हे ही वाचा : काचा फोडण्याच्या घटनांमुळे नागरिकांमध्ये पसरले आहे दहशतीचे वातावरण

परिसरात डास आणि दुर्गंधी पसरली होती. याचा त्रास नागरिकांना सहन करावा‌ लागत होता. महापालिका अधिकारी पाहून जायचे, परंतु तात्पुरत्या स्वरुपात काम केले जायचे. पुन्हा गळती व्हायची. सांडपाणी वाहिनीचे काम लवकरात लवकर करावे. यांसंबधीचे वृत्त सकाळने प्रसिद्ध केले होते. या वृत्ताची दखल घेत महापालिका प्रशासनाकडून सांडपाणी वाहिनी साफ करण्यात आली आहे. याठिकाणी आता पाणी साचत नाही आणि मैदानावर पाणी येत नाही.

आम्ही याठिकाणी सांडपाणी वाहिनी साफ केली आहे. दोन दिवसांनंतर चेंबर बसविण्यात येईल.
- शंकर खंडागळे, अभियंता, पुणे महापालिका

सांडपाणी वाहिनी गळतीमुळे सह्याद्री मैदानाची दूरावस्था झालेली होती. महापालिकेकडून लगेचच काम करण्यात आले. सांडपाणी वाहिनी साफ केल्यामुळे महापालिका आणि सकाळचे धन्यवाद. 
- गणेश वाघचौडे, नागरिक