आंबेगाव बुद्रुक : आंबेगाव येथील हिल व्हिव सोसायटी समोर दत्तनगर नऱ्हे रस्त्यावर असणाऱ्या पुलाच्या संरक्षक लोखंडी ग्रीलला धडकून एका मुलाचा जागीच मृत्यू झाला.

युग जिग्नेश वडसोला (वय १२ वर्ष रा.अमित अस्ट्रॉनिया सोसायटी ) असे या मुलाचे नाव आहे. युग हा दत्तनगर कडून आपल्या सायकलवर बुधवारी (ता. 3) आंबेगावच्या दिशेने जात होता. दरम्यान, दत्तनगर आंबेगावकडे जाताना असणाऱ्या तीव्र उताराला सायकलचा वेग न आवरल्याने सायकलची रस्त्यावर असलेल्या संरक्षक लोखंडी ग्रीलला धडक बसली.

त्यामुळे झालेल्या अपघातात युग याचा जागीच मृत्यू झाला. या अपघाताची दत्तनगर पोलिस चौकीत अकस्मात मृत्यू म्हणून नोंद करण्यात आली आहे. या घटनेचा पुढील तपास सहायक पोलिस निरीक्षक आशिष कवठेकर करत आहेत.