लोहगाव : येरवडा मध्यवर्ती कारागृहातील बंदयांना स्वयंरोजगाराचे प्रशिक्षण देऊन स्वतःचा व्यवसाय सुरू करण्यासाठी कर्जपुरवठा करण्याच्या महाराष्ट्र बँकेने सुरू केलेल्या योजनेचा प्रारंभ मंगळवारी (ता. ७) करण्यात आला.

यावेळी कारागृह महानिरीक्षक अतुलचंद्र कुलकर्णी, उपमहानिरीक्षक योगेश देसाई, प्रभारी उपमहानिरीक्षक सुनील ढमाळ, येरवडा कारागृह अधीक्षक राणी भोसले, उपअधीक्षक प्रदीप जगताप, महाराष्ट्र बँकेचे अंचल प्रबंधक विवेक धवन, कार्यकारी संचालक विवेककुमार, बँकेच्या ग्रामीण स्वयंरोजगार प्रशिक्षण संस्थेचे संचालक संजय मांढरे उपस्थित होते.

या उपक्रमाचे उदघाटन केल्यावर विवेक धवन म्हणाले, की अशी अभिनव योजना राबविणारे महाराष्ट्र हे कदाचित देशातील पहिले राज्य असावे. कारागृह महानिरीक्षक कुलकर्णी म्हणाले, केंद्र सरकार ग्रामीण विकास मंत्रालयांतर्गत ग्रामीण भागातील बेरोजगारी कमी करण्यासाठी राष्ट्रयीकृत बँकांमार्फत विविध प्रकारचे स्वयंरोजगार प्रशिक्षण कार्यक्रम राबवित आहे. कारागृहातील बंदयांनी विशेषतः महिला बंदयांनी हे प्रशिक्षण घेतल्यास कारागृहातून सुटका झाल्यानंतर त्यांना स्वतःचा व्यवसाय सुरू करण्यासाठी महाराष्ट्र बँकेकडून कर्जपुरवठा करण्यात येईल. यामुळे बंदयांना स्वतःच्या पायावर उभे राहून कुटुंबाचा चरिथार्थ चालवण्यास मदत होईल.

महाराष्ट्र बँकेचे विजयकुमार म्हणाले, देशातील राष्टीयकृत बँका मोठ्या प्रमाणात कर्जमेळावे घेऊन लहानातील लहान उद्योगासाठी कर्जपुरवठा करून नागरिकांना आत्मनिर्भर बनण्यासाठी मदत करत आहेत.