सकाळ न्यूज नेटवर्क
नवी दिल्ली, ता.४ ः भारताकडून आयोजित केल्या जाणाऱ्या भू-राजकीय तसेच भू-आर्थिक विषयावरीलर ‘रायसिना डायलॉग’ परिषदेला गुरुवारपासून (ता.५) दिल्लीत सुरुवात होत आहे. फिनलंडचे अध्यक्ष अलेक्झांडर स्टब हे यंदाच्या परिषदेचे प्रमुख पाहुणे आहेत. परराष्ट्र राज्यमंत्री व्ही. के. सिंह यांनी आज इंदिरा गांधी आंतरराष्ट्रीय विमानतळावर स्टब यांचे स्वागत केले.
मागील काही काळात जागतिक उलथापालथ वाढली आहे. या पार्श्वभूमीवर होणाऱ्या ‘रायसिना डायलॉग’ परिषदेला महत्त्व आले आहे. भारत-फिनलंड यांच्यातील संबंध मित्रत्वाचे तसेच लोकशाही मूल्यांवर आधारित आहेत. स्टब यांच्या दौऱ्यामुळे हे संबंध आणखी मजबूत होतील, अशी प्रतिक्रिया परराष्ट्र खात्याचे प्रवक्ते रणधीर जयस्वाल यांनी सोशल मीडियाच्या माध्यमातून दिली आहे. स्टब यांच्यासमवेत फिनलंडच्या वरिष्ठ अधिकाऱ्यांचे एक पथक भारतात आले असून विविध क्षेत्रात दोन्ही देशांदरम्यान सुरु असलेल्या उपक्रमांचा या दौऱ्यात आढावा घेतला जाणार आहे. येत्या शनिवारपर्यंत (ता. सात) ‘रायसिना डायलॉग’ परिषद होणार आहे.