भोर - वेनवडी (ता. भोर) डोंगरावर दुर्मीळ ‘ॲटलस मॉथ’ नावाचा पतंग (फुलपाखरू) आढळून आले. भोरमधील शिक्षक आनंता कदम व केशव पवळे यांच्या दृष्टीस हा पतंग पडला. सकाळी मॉर्निंग वॉकला गेल्यावर फूटभर लांब पंख असलेले मोठे फुलपाखरू दगडावर बसलेले त्यांना दिसले. त्यांनी कुतुहलाने त्याचे फोटोही काढले. परंतु काही वेळाने ते फुलपाखरू एका छोट्या पक्षाप्रमाणे उडून गेले. हे फुलपाखरू नक्की काय होते याची जाणीव त्यांना झाली नाही. त्यामुळे त्यांनी पिसावरे येथील पक्षिनिरीक्षण मंडळाचे प्रमुख संतोष दळवी यांच्याशी संपर्क साधला. त्यांनी हे फुलपाखरू नसून ‘ॲटलस मॉथ’ नावाचा पतंग असल्याचे सांगितले.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

याविषयी अधिक माहिती देताना श्री. दळवी यांनी सांगितले की, हा महिना देशात बटरफ्लाय मंथ म्हणून ओळखला जातो. या महिन्यात सर्वाधिक फुलपाखरे व  पतंगाचे दर्शन होते. अनेक लोक पतंग (मॉथ) आणि फुलपाखरे (बटर फ्लाय) यात गोंधळून जातात. पंरतु पतंग संध्याकाळी कृतिशील असतात, तर फुलपाखरे सकाळपासून संध्याकाळ पर्यंत कृतिशील राहतात. पतंग पंख मिटवत नाहीत तर पसरून बसतात. याऊलट फुलपाखरू सतत पंखांची हालचाल करत असते.

राज्यातील पोलीस भरती जाहीर; भरती प्रक्रिया नेमकी कशी असणार याबाबत उमेदवार संभ्रमात

या पतंगाविषयी...

• आशिया खंडातील जंगलात आढळणारी ही स्थानिक प्रजाती
• १७५८ मध्ये कार्ल लिनीअसने केली प्रजातीची नोंद 
• ‘व्हाइट वीच’ आणि ‘अटॅकस सिजर’ या दोन प्रजातीच ॲटलस मॉथपेक्षा मोठ्या.
• मॉथचा पंखांचा विस्तार (दोन पंखांतील अंतर) जास्तीत जास्त २४ सेंमी
• मादी ही नरापेक्षा मोठी, नराच्या मिशा रुंद असतात. 
• शरीर पंखांच्या तुलनेत खूप लहान.
• ‘ॲटलस मॉथ’चे आयुष्य साधारण १ ते २ आठवडे.

‘ॲटलस मॉथ’ची वैशिष्ट्ये

• मादी शरीरातून एक प्रकारचा रासायनिक द्रव सोडते. 
• याचा वास नरास कित्येक किलोमीटर दूर येतो. 
• नर आणि मादीचे मिलन झाल्यावर अंडी देऊन मादी मरण पावते. 
• अंड्यातून मातकट हिरवट रंगाचे सुरवंट बाहेर येतात. 
• साधारण ४ सेंटिमीटरपर्यंत सुरवंटाची वाढ होते.
• लिंबू, संत्रे, पेरूच्या पानांवर, वनस्पतीवर यांची वाढ होते.  
• चार आठवडे कोषाच्या अवस्थेत काढल्यावर सुरवंटाचे मॉथमध्ये रूपांतर.

Edited By - Prashant Patil