पुणे - कोथरूड परिसरातील पेठे ज्वेलर्स या सराफी दुकानामध्ये चोरट्यांनी भरदिवसा गोळीबार करीत दहशत निर्माण केली. पिस्तुलाचा धाक दाखवून दुकानातील लाखो रुपये किमतीचे ५०० ते ६०० ग्रॅम वजनाचे सोन्याचे दागिने चोरून नेले. ही घटना दुपारी सव्वाचारच्या सुमारास घडली. सुदैवाने गोळीबारामध्ये कोणीही जखमी झाले नाही. 

'सकाळ'चे मोबाईल ऍप डाऊनलोड करा

याप्रकरणी कर्मचारी मंगेश वेद यांनी कोथरूड पोलिस ठाण्यात फिर्याद दिली आहे. पोलिसांनी दिलेल्या माहितीनुसार, आनंदनगर येथे मुख्य चौकामध्ये पराग पेठे यांच्या मालकीची पेठे ज्वेलर्स नावाची सराफी पेढी आहे. दुकानात दुपारी सव्वाचार वाजता दोघे जण ग्राहक असल्याचा बहाणा करीत दुकानामध्ये आले. त्या वेळी पेठे दुकानामध्ये नव्हते. दुकानात प्रवेश करताच त्यातील एकाने कमरेला लावलेले पिस्तूल काढून दुकानातील चार कर्मचाऱ्यांवर रोखून धमकावले. त्याचवेळी दोन गोळ्या हवेत झाडून कर्मचाऱ्यांमध्ये दहशत निर्माण केली. त्यामुळे कर्मचाऱ्यांनी आरडाओरडा केला नाही. त्यानंतर घाबरलेल्या कर्मचाऱ्यांनी चोरट्यांनी सांगितल्याप्रमाणे सोन्याच्या दागिन्यांचे ट्रे काढून दिले. काही मिनिटांतच सोन्याच्या दागिन्यांनी भरलेली सॅक घेऊन चोरटे दुकानाबाहेर पडले. तेथून दुचाकीवरून चांदणी चौकाच्या दिशेने पळून गेले. 

दरम्यान, कर्मचाऱ्यांनी याबाबत पेठे यांना चोरी झाल्याचे सांगितले. त्यांनी तत्काळ पोलिसांना कळविले. त्यानंतर गुन्हे शाखेचे अतिरिक्त पोलिस आयुक्त अशोक मोराळे, उपायुक्त बच्चन सिंह, शिरीष सरदेशपांडे, डॉ. शिवाजी पवार, कोथरूड पोलिस ठाण्याच्या वरिष्ठ पोलिस निरीक्षक प्रतिभा जोशी यांनी घटनास्थळी भेट दिली. चोरट्यांनी लुटलेल्या दागिन्यांपैकी काही दागिने सोन्याचे पाणी दिलेले (गोल्ड प्लेटेड) असल्याची माहिती पोलिसांनी दिली. 

चोरीचे दृश्‍य सीसीटीव्हीत कैद
चोरट्यांनी दुकानामध्ये घुसून चोरी करतानाचे दृश्‍य दुकानातील सीसीटीव्हीमध्ये कैद झाले आहे. पोलिसांनी सीसीटीव्ही चित्रीकरण ताब्यात घेतले आहे. तसेच, कोथरूड पोलिस व गुन्हे शाखेची पथके तत्काळ आरोपींच्या मागावर पाठविण्यात आली आहेत.