सातगाव पठार (पुणे) : सातगाव पठार (ता. आंबेगाव) भागात बटाटा काढणीचा हंगाम सुरू असतानाच मुसळधार पावसाने हजेरी लावल्याने काढणीला आलेले बटाटे सडले आहेत. शेतकऱ्यांच्या हातातोंडाशी आलेला घास निसर्गाच्या अवकृपेमुळे हिरावला गेला आहे. त्यामुळे सरकारने पंचनामे करून शेतकऱ्यांना त्वरित नुकसान भरपाई मिळवून द्यावी, अन्यथा या परिसरातील शेतकरी मोठ्या आंदोलनाच्या भूमिकेत असल्याचे पेठ (ता. आंबेगाव) येथील बटाटा उत्पादक शेतकरी राम तोडकर यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप

आंबेगाव तालुक्‍यातील सातगाव पठार भागात गेले काही दिवस मुसळधार पाऊस हजेरी लावत आहे. या सततच्या मुसळधार पावसामुळे शेतामध्ये पाणी साचून राहत आहेत. शेतात पाणी साचत असल्याने काढणीला आलेले बटाटे साचलेल्या पाण्यामुळे काढता येत नाहीत. परिणामी ते बटाटे काढतानाच बहुतांशी प्रमाणात सडलेले निघत आहेत. त्यानंतर काढून झालेले बटाटे शेताच्या बांधावर आरण लावून सुरक्षित झाकून ठेवले तरी दोन ते तीन दिवसांनंतर त्यातीलही बटाटे सडण्याच्या प्रमाणात वाढ झाली आहे. 

पुण्याच्या बातम्या वाचण्यासाठी येथे ► क्लिक करा

सातगाव पठार भागातील पेठ, पारगाव तर्फे खेड आदी परिसरातील शेतकऱ्यांचे खूप मोठे नुकसान होत आहे. जवळपास निम्मे बटाटे सडल्याने टाकून द्यावे लागत आहेत. त्यामुळे अगदी हाता-तोंडाशी आलेला घास निसर्गाच्या अवकृपेमुळे हिरावला गेला असून शेतकऱ्यांचा या पिकासाठी झालेला भांडवली खर्च वसूल होणार की नाही याबाबत आता शाश्वतीच नसल्याचे येथील बटाटा उत्पादक शेतकरी अशोक बाजारे, सोपान नवले, रमेश काळे, शंकर काळे, विकास बारवे, अनिल एरंडे, शिवाजी पवळे, उमेश कंधारे आदी शेतकऱ्यांनी सांगितले.