आळंदी - संत ज्ञानेश्वर महाराज पालखी सोहळा (Sant Dnyaneshwar Maharaj Palkhi Sohala) आषाढी वारीसाठी (Aashadhi Wari) तब्बल दोन वर्षाच्या विश्रांतीनंतर यंदा प्रथमच २१ जूनला पंढरपूरकडे (Pandharpur) पायी प्रस्थान करणार आहे. ९ जुलैला सोहळा पंढरीत पोहचेल. तर मुख्य आषाढी एकादशी १० जुलैला आहे.

पंढरपूरमध्ये आषाढी वारी पालखी सोहळा नियोजनाची बैठक पालखी सोहळ्याचे मालक बाळासाहेब आरफळकर यांच्या अध्यक्षतेखाली झाली. या बैठकीस श्रीमंत ऊर्जितसिंह शितोळे, प्रमुख विश्वस्त योगेश देसाई, विश्वस्त डॉ. अभय टिळक, नामदेव महाराज वासकर, राणू महाराज वासकर, श्री विठ्ठल रुक्मिणी मंदिर समितीचे विश्वस्त माउली जळगावकर, दिंडी समाजाचे अध्यक्ष भाऊ महाराज गोसावी, सचिव मारुती कोकाटे, बाळासाहेब रणदिवे चोपदार, भागवत चवरे, भाऊ फुरसुंगीकर, सोपानकाका टेंबुकर, गुरुजीबुवा राशीनकर, एकनाथ हांडे, व्यवस्थापक माउली वीर यांच्यासह दिंडी प्रमुख व फडकरी उपस्थित होते.

दरम्यान, सोहळा २१ जूनला आळंदीतून पंढरीकडे प्रस्थान करणार आहे. तिथीची वृद्धी झाल्याने लोणंदमध्ये (जि. सातारा) अडीच दिवस; तर पुणे, सासवड व फलटणमध्ये प्रत्येकी दोन दिवस सोहळा मुक्कामी राहील. तर, दिंडीकऱ्यांच्या मागणीनुसार संस्थानच्या सही शिक्क्याने दिंडीकऱ्यांना वाहन पास दिले जाणार आहे.

दरम्यान, संत ज्ञानेश्वर महाराज पालखी सोहळा प्रमुखपदी ॲड. विकास ढगे यांची निवड करण्यात आली. यावेळी ऊर्जितसिंह शितोळे सरकार यांनी ढगे यांना शाल-श्रीफळ देत सन्मान केला.