पुणे - आमच्या सहनशीलतेचा अंत पाहू नका, संमेद शिखरजी तीर्थक्षेत्राचे पावित्र्य कायम राखण्यासाठी आम्ही सर्व संत आपल्या प्राणांची बाजी लावण्यास तयार आहोत, असा निर्वाणीचा इशारा जैन संतांनी सोमवारी  केंद्र सरकार आणि झारखंडमधील भारतीय जनता पक्षाच्या सरकारला दिला. 

जैन धर्मीयांच्या पवित्र अशा ‘संमेद शिखरजी’ या पूजास्थळी मांसाहार, मद्यविक्री सुरू होण्याचा धोका निर्माण झाल्याने जैन साधू- साध्वी, तसेच समाजाने ‘सेव्ह शिखरजी’ ही मोहीम सुरू केली आहे. त्या अंतर्गत हा ‘मूक मोर्चा’ काढण्यात आला. तत्पूर्वी झालेल्या प्रवचनाला आचार्य युगभूषणसुरीश्‍वरजी, मुनीश्री पुलकसागरजी, आचार्य रविचंद्रसुरीश्‍वरजी, पन्यास अरुणविजयजी महाराज यांच्यासह त्यांचे शिष्य आणि साध्वीजी उपस्थित होते. त्या वेळी संतांनी हा इशारा दिला. त्यानंतर हजारो जैन बांधवांनी ओसवाल पंचायत भवन येथून जिल्हाधिकारी कार्यालयापर्यंत पायी ‘मूक मोर्चा’ काढला. चारही संप्रदायांच्या वतीने अचल जैन, ॲड. एस. के. जैन, अभय छाजेड, प्रवीण चोरबेले, बाळा ओसवाल, हिराचंद राठोड, शोभा धारिवाल, फत्तेचंद रांका, विजय भंडारी, शर्मिला ओसवाल आदींनी निवासी उपजिल्हाधिकारी जयश्री कटारे यांना निवेदन दिले. 

मोर्चाच्या यशस्वितेसाठी बालचंद कटारिया, सतीश शहा, राजेश घीवाला, विमल संघवी, राजेंद्र बांठिया, ललित गुंदेचा, रमेश गांधी, राकेश जैन, मिलिंद फडे, भरत सुराणा, रमेश राठोड, चिन्मय शहा, नितीन जैन, प्रशांत गांधी, आदेश खिंवसरा, विविध मंदिरांचे विश्‍वस्त आदींनी प्रयत्न केले.

शेकडो वर्षांच्या गुलामगिरीनंतर महात्मा गांधी यांनी अहिंसात्मक लढा देऊन देशाला स्वातंत्र्य मिळवून दिले. आम्हीही अशाच प्रकारे शांततेने आंदोलनाची तयारी केली आहे, याचे भान केंद्र आणि झारखंड सरकारने ठेवावे. 
- मुनीश्री पुलकसागरजी महाराज