पुणे : शैक्षणिक वेळापत्रक पूर्ववत करण्याच्या दृष्टीने सावित्रीबाई फुले पुणे विद्यापीठाने उपाययोजना करण्यास सुरवात केली आहे. विद्यापीठाशी संलग्न महाविद्यालयांच्या सत्र परीक्षांना डिसेंबर अखेरीस सुरुवात होणार असून, पहिल्या टप्प्यात विविध पदवी आणि पदव्युत्तर अभ्यासक्रमांच्या अंतिम वर्षांच्या परीक्षा घेण्याला प्राधान्य देण्यात येणार आहे. यंदाची परीक्षा विद्यापीठाच्या प्रचलित पद्धतीनुसार म्हणजेच लेखी पद्धतीने होणार आहेत, याची विद्यार्थ्यांनी नोंद घ्यावी, असे आवाहन विद्यापीठातर्फे करण्यात आले आहे.

विद्यापीठाचे शैक्षणिक विभाग आणि संलग्न महाविद्यालयांमध्ये विविध अभ्यासक्रमांच्या परीक्षा डिसेंबर अखेरीस घेण्याचे नियोजन परीक्षा व मूल्यमापन मंडळाकडून करण्यात येत आहे. त्यासाठी विद्यार्थ्यांचे परीक्षा अर्ज ऑनलाइन पद्धतीने भरण्याची प्रक्रिया सुरू झाली आहे. कला, वाणिज्य आणि विज्ञान शाखेतील अभ्यासक्रमांचे प्रथम वर्षांचे प्रवेश काही दिवसांपूर्वी पूर्ण झाले असून, काही ठिकाणी प्रवेशाची प्रक्रिया सुरू आहेत.

त्यामुळे या अभ्यासक्रमांच्या परीक्षांना काही दिवसांनी सुरुवात होईल. महाविद्यालयील स्तरावरील अंतर्गत परीक्षा, प्रात्यक्षिके, तोंडी परीक्षा आदींबाबतची कार्यवाही करण्यालाही लवकर सुरुवात होणार आहे. पदवी आणि पदव्युत्तर अभ्यासक्रमांचे प्रथम वर्ष वगळता इतर वर्षांचे शैक्षणिक वर्ष वेळेत सुरू झाले आहे.

त्यामुळे या विद्यार्थ्यांचे शैक्षणिक नुकसान होऊ नये, यासाठी पुणे विद्यापीठाच्या परीक्षा व मूल्यामापन मंडळाने सत्र परीक्षांचे नियोजन करण्याला सुरुवात केली आहे. त्यानुसार या विद्यार्थ्यांच्या परीक्षांना डिसेंबरच्या अखेरीस सुरुवात होणार आहे. विविध अभ्यासक्रमांच्या अंतिम वर्षाला असणाऱ्या विद्यार्थ्यांना उच्च शिक्षण घ्यायचे असते. त्यामुळे या विद्यार्थ्यांच्या परीक्षा वेळेत होउन निकाल, लवकर प्रसिद्ध होणे गरजेचे असते. त्यामुळे या परीक्षांना प्राधान्य देण्यात येणार आहे, असे परीक्षा व मूल्यमापन विभागाकडून सांगण्यात आले.