पुणे : जिल्ह्यात काही दिवसांपासून कोरोना संसर्गाचे (corona)प्रमाण कमी झाल्यामुळे मार्गदर्शक सूचनांचे पालन करून एक फेब्रुवारीपासून शाळा सुरू करण्यात याव्यात. तसेच, महापालिका क्षेत्रातील शाळांमध्ये फिरत्या पथकाद्वारे लसीकरणाची(vaccination) सुविधा उपलब्ध करून देण्यात यावी, असे निर्देश उपमुख्यमंत्री अजित पवार(ajit pawar) यांनी दिले. विभागीय आयुक्त कार्यालयात शनिवारी (ता. २९) आयोजित जिल्हा कोविड व्यवस्थापन आढावा बैठकीत ते बोलत होते. गृहमंत्री दिलीप वळसे पाटील, विधान परिषदेच्या उपसभापती डॉ. नीलम गोऱ्हे, खासदार डॉ. अमोल कोल्हे, विभागीय आयुक्त सौरभ राव, जिल्हाधिकारी डॉ. राजेश देशमुख या वेळी उपस्थित होते.

पवार म्हणाले, पहिली ते आठवीचे वर्ग अर्धवेळ सुरू करण्यात यावेत. तर, नववी ते बारावीचे वर्ग पूर्णवेळ सुरू करावेत. पुढील आठवड्यात कोरोना परिस्थितीचा आढावा घेऊन सर्व शाळा पूर्णवेळ सुरू करण्याबाबत निर्णय घेण्यात येईल. विद्यार्थ्यांना शाळेत पाठविण्याबाबतचा निर्णय पालकांनी घ्यावा, त्याबाबत तूर्तास सक्ती करू नये. एक फेब्रुवारीपासून महाविद्यालये सुरू होत असल्यामुळे लसीच्या दोन मात्रा घेतलेल्या विद्यार्थ्यांना प्रवेश देण्यात यावा. लसीकरण झाले नसल्यास विद्यार्थ्यांना लसीकरणाबाबत सूचना देण्यात याव्यात.

लसीकरणामुळे मृत्यूच्या प्रमाणात घट होत असून, लसीकरणावर विशेष भर द्यावा. ग्रामीण भागातील शाळांमधून लसीकरणाची सुविधा उपलब्ध करून दिली आहे. त्यामुळे ग्रामीण भागात १५ ते १८ वयोगटातील मुलांच्या लसीकरणाचे प्रमाण चांगले आहे. परंतु शहरी भागात ते कमी आहे. त्यामुळे महापालिका क्षेत्रातील शाळांमधून फिरत्या लसीकरण केंद्राद्वारे लसीकरणाची सुविधा उपलब्ध करून द्यावी. लसीकरण वाहनासोबत वैद्यकीय अधिकाऱ्याची नियुक्ती करावी. संस्थाचालकांनी शाळेत कोरोना प्रतिबंधक नियमांचे पालन आणि विद्यार्थ्यांचे पूर्ण लसीकरण होईल याची दक्षता घ्यावी.

प्रारंभी गृहमंत्री वळसे पाटील यांनी विद्यार्थ्यांचे शैक्षणिक नुकसान टाळण्यासाठी शाळा लवकर सुरू करण्याची सूचना केली. तसेच, डॉ. गोऱ्हे यांनी विद्यार्थ्यांचे शैक्षणिक नुकसान होत असून, पहिली ते आठवीचे वर्ग अर्धवेळ सुरू करण्यात यावे. शाळेतही विद्यार्थ्यांची गर्दी होणार नाही, याची दक्षता घेण्याची सूचना केली.

बैठकीस आमदार अशोक पवार, दिलीप मोहिते, सुनील टिंगरे, चेतन तुपे, महापालिका आयुक्त विक्रम कुमार, राजेश पाटील, पोलिस आयुक्त अमिताभ गुप्ता, कृष्ण प्रकाश, विशेष पोलिस महानिरीक्षक मनोज लोहिया, जिल्हा पोलिस अधीक्षक डॉ. अभिनव देशमुख, लोकप्रतिनिधी आणि अधिकारी उपस्थित होते.

मास्क अनिवार्यच

मास्क न वापरण्याविषयी मंत्रिमंडळ बैठकीत कोणतीही चर्चा झाली नाही. कोरोनाचे संकट अद्याप कायम असून, नागरिकांनी मास्क वापरण्यासोबतच मार्गदर्शक सूचनांचे पालन करणे आवश्यक आहे. नागरिकांनी संसर्गापासून बचाव करण्यासाठी चांगला मास्क वापरावा. मास्क न वापरणाऱ्यांविरोधात कारवाई सुरूच ठेवावी, अशा सूचना पवार यांनी दिल्या..

विनामास्क नागरिकांना ७६ लाखांचा दंड

जिल्ह्यात मागील आठवड्यात ९० हजार १३७ नवीन रुग्ण(corona patients) आढळले आहेत. जिल्ह्यातील सर्व लाभार्थ्यांनी लसीची पहिली मात्रा तर, ८५ टक्के लाभार्थ्यांनी दुसरी मात्रा घेतली आहे. ६० वर्षांवरील सहव्याधी असलेल्या २३ टक्के नागरिकांनी लसीची वर्धक मात्रा (booster dose) घेतली आहे. कोरोना नियमांचे उल्लंघन करणाऱ्यांविरोधात कारवाई करून ७५ लाख ९२ हजार रुपये दंड वसूल करण्यात आला आहे, अशी माहिती विभागीय आयुक्त राव(sourav rao) यांनी दिली