बारामती, ता. 12- ज्येष्ठ नेते शरद पवार यांची प्रकृती आज व्यवस्थित असून त्यांनी गोविंदबाग या त्यांच्या निवासस्थानी नागरिक व कार्यकर्त्यांशी संवाद साधला.

शनिवारी (ता. 11) विद्या प्रतिष्ठानची बैठक सुरु असताना त्यांना अस्वस्थ वाटू लागल्याने डॉक्टरांना पाचारण करण्यात आले होते. दिल्ली येथील वास्तव्यामुळे प्रदूषणामुळे त्यांच्या घशाला सूज आली होती.

काल त्यांना अस्वस्थ वाटत असल्याने विश्रांतीचा सल्ला दिला होता अशी माहिती त्यांच्यावर उपचार करणारे डॉ. रमेश भोईटे यांनी दिली. काल शारदोत्सवाच्या कार्यक्रमालाही त्या मुळे शरद पवार उपस्थित राहू शकले नाहीत.

दरम्यान रविवारी (ता. 12) सकाळी पुन्हा डॉ. रमेश भोईटे यांनी शरद पवार यांची तपासणी केली. त्यांची तब्येत उत्तम असल्याचे त्यांनी सांगितले. आजचा दिवस त्यांनी विश्रांती घ्यावी असा सल्ला त्यांना दिल्याचेही डॉ. भोईटे म्हणाले. पुरंदर तालुक्याचा रविवारचा नियोजित दौरा रद्द करण्याचाही सल्ला डॉक्टरांनी पवार यांना दिला आहे.

दरम्यान दिवाळीच्या काळात पवार कुटुंबिय बारामतीत वास्तव्यास असते. दिवाळीला राज्यभरातून येणाऱ्या कार्यकर्ते व नागरिकांना शरद पवार गोविंदबागेत भेटत असतात. यंदा पाडव्याच्या दिवशी (ता. 14) श्री महावीर भवन येथे संध्याकाळी पाच वाजता बारामतीच्या व्यापाऱ्यांशीही शरद पवार संवाद साधणार आहेत.