किरकोळ कारणावरून
काठी, विळ्याने मारहाण

सांगोला, ता. २५ : गाडी आडवी का घालतो म्हणून तिघांनी सोळा वर्षीय मुलाला विळा व काठीने मारहाण केल्याची घटना वाढेगाव (ता. सांगोला) २० फेब्रुवारी रोजी सकाळी घडली. या प्रकरणी तिघांविरुद्ध सांगोला ठाण्यात गुन्हा दाखल करण्यात आला.
२० फेब्रुवारी रोजी सकाळी सुमारे आठ वाजता वाढेगाव येथे फिर्यादी सुरेश रामहरी पाटील (वय ४३, व्यवसाय-शेती, रा. वाढेगाव) यांचा मुलगा विश्वजित सुरेश पाटील (वय १६) याने गाडी आडवी का घातली, या कारणावरून वाद झाला. या वादातून मोहन ईश्वर दिघे याने विळ्याने विश्वजितच्या उजव्या बाजूच्या पोटावर वार करून जखमी केले. तसेच रामचंद्र गोविंद दिघे याने काठीने पाठीत मारहाण केली. त्यानंतर मोहन दिघे, रामचंद्र दिघे व रविंद्र मधुकर दिघे (सर्व रा. वाढेगाव) यांनी शिवीगाळ करून जीवे मारण्याची धमकी दिल्याचा आरोप आहे. जखमी विश्वजितला उपचारासाठी सांगोल्यातील खासगी हॉस्पिटलमध्ये दाखल करण्यात आले. दवाखान्यातील नोंदीनंतर या घटनेची तक्रार दाखल करण्यात आली.