इंदापूर : इंदापूर नगरपरिषद प्रशासन कामावर अंकुश ठेवण्याचे काम जबाबदार विरोधी पक्ष म्हणून केल्याने आगामी नगरपरिषद निवडणूकीतपाच ते सहा नगरसेवक निश्चित निवडून येतील असा दावा बहुजन मुक्ती पार्टीचे राष्ट्रीय महासचिव ॲड.राहुल मखरे यांनी केला. आगामी इंदापूर नगरपरिषद निवडणूकीच्या पार्श्वभूमीवर इंदापूर शासकीय विश्रामगृहात आयोजित पत्रकार परिषदेत ते बोलत होते.

यावेळी ॲड. मखरे पुढे म्हणाले, आम्ही इंदापूर शहर जनतेच्या अडचणी सोडविण्या साठी आंदोलने केली. इंदापूर नगरपरिषद हद्दीत होणाऱ्या प्रत्येक कामावरती लक्ष ठेवले .निकृष्ट दर्जाच्या कामाचा पर्दाफाश करून ही कामे दर्जेदार करून घेतली. त्यामुळे शहरातील नागरिकांचा आमच्यावर विश्वास असल्याने आम्ही इंदापूर नगरपालिकेच्या सर्व जागा स्वबळावर लढवू.

नगरपरिषदेत स्वच्छ कारभार,दलाली मुक्त कामे, स्वच्छ इंदापूर, विकास कामांना प्राधान्य देण्याचे विषय व मुद्दे घेऊन आम्ही ही निवडणूक लढणार आहे. या निवडणूकीत आम्हाला दोन मते कमी पडली तरी चालतील पण आम्हीआमची विचारधारा कधीही सोडणार नाही.माझ्याकडे सत्ता आल्यास मी सर्वांचे प्रश्न सोडविण्यास सर्वोच्च प्राधान्य देईल असे मत शेवटी ॲड. राहुल मखरे यांनी मत व्यक्त केले.

यावेळी बहुजन मुक्ती पार्टीचे बाबासाहेब भोंग ,संजय शिंदे,संतोष क्षिरसागर,सुरज धाईंजे, वसीम शेख, प्रकाश पवार उपस्थित होते.