जिल्ह्यात मतदार घटले तरीही मतदान केंद्रांत वाढ शक्य

एसआयआर : जिल्हाधिकाऱ्यांच्या प्रस्तावावर मुख्य निवडणूक अधिकारी घेणार निर्णय

सकाळ वृत्तसेवा
सोलापूर, ता. २४ : भारत निवडणूक आयोगातर्फे राबविण्यात येणाऱ्या एसआयआर मोहिमेत सोलापूर जिल्ह्यातील जवळपास ६ लाख २० हजार ३६१ मतदार कमी होण्याची शक्यता आहे. जिल्ह्यातील मतदारांची संख्या कमी झाली तरी मतदान केंद्रांच्या संख्येत किंचितशी वाढ होण्याची शक्यता आहे. मतदान केंद्रांचे सुसूत्रीकरण करताना ही वाढ होण्याची शक्यता असून, यासंदर्भातील प्रस्ताव जिल्हाधिकारी कार्यालयातर्फे भारत निवडणूक आयोगाच्या मुख्य निवडणूक अधिकाऱ्यांना पाठविण्यात आला आहे.
सोलापूर जिल्ह्यात सध्या ३९ लाख ४१ हजार ९५ मतदार आहेत. एसआयआर मोहिमेत ६ लाख २० हजार ३६१ मतदारांचे गणनापत्रक मिळाले नाही. त्यामध्ये १ लाख ७ हजार ६५० मतदार मयत असल्याचे समोर आले आहे. बीएलओंकडून घरोघरी जाऊन तपासणी करताना तिन्ही वेळा गैरहजर आढळलेल्या मतदारांची संख्या १ लाख ३२ हजार ४६७ आहे. स्थलांतरित झालेल्या मतदारांची संख्या २ लाख १० हजार १६३, तर सध्याच्या मतदार यादीत १ लाख ५ हजार ६८४ मतदार दुबार असल्याचे समोर आले आहे.
एसआयआरमध्ये गणनापत्रक भरण्याचे काम पूर्ण झाले असून, आता जिल्ह्यातील ३ हजार ७२३ मतदान केंद्रांचे सुसूत्रीकरण केले जाणार आहे. यामध्ये भौगोलिक सलगता, सध्याच्या मतदान केंद्राच्या इमारतीची स्थिती यांचा विचार केला जाणार आहे. आवश्यकता असल्यास मतदान केंद्र दुसऱ्या इमारतीत स्थलांतरित केले जाईल. मतदाराच्या घरापासून दोन किलोमीटरच्या मर्यादेत मतदान केंद्र असावे, तसेच एका इमारतीमधील मतदारांचा समावेश शक्यतो एकाच मतदान केंद्रावर असावा, याची दक्षता घेतली जाणार आहे.
२०२४ च्या लोकसभा व विधानसभा निवडणुकीत मतदान केंद्र वेगवेगळ्या ठिकाणी आल्यामुळे मतदारांना त्रास झाला होता. एसआयआरमध्ये ही बाबही विचारात घेतली जाणार आहे. भारत निवडणूक आयोगाकडून सोलापूरचा प्रस्ताव मंजूर झाल्यानंतरच मतदान केंद्रांमधील नवे बदल स्पष्ट होतील.

एका केंद्रावर १२०० मतदार
वेळेत मतदान प्रक्रिया पूर्ण होण्यासाठी एका मतदान केंद्रावर सरासरी १२०० मतदारांचा समावेश असावा, असा नियम आहे. प्रत्यक्षात मात्र अनेक ठिकाणी मतदारांची संख्या १५०० ते १८०० एवढी आहे. त्यामुळे मतदानासाठी वेळ लागणे, मतदानाची आकडेवारी संकलित करताना अडचणी येणे यासह अनेक प्रश्न उद्‍भवत आहेत. आता मतदान केंद्रांच्या सुसूत्रीकरणात १२०० मतदारसंख्येचा निकष तंतोतंत पाळण्याचा प्रयत्न केला जाणार आहे. त्यामुळे आगामी निवडणुकीतील अनेक अडचणी कमी होण्यास मदत होणार आहे.