Student Scholarship - पुणे नॉलेज क्लस्टरच्या (पीकेसी) वतीने संशोधन क्षेत्रात कार्यरत महिला आणि विद्यार्थिनींसाठी Student Scholarship शिष्यवृत्ती घोषित करण्यात आली आहे. वैज्ञानिक संशोधनासाठी महिलांना प्रोत्साहन ‘वी ज्ञान’ उपक्रमाअंतर्गत ही शिष्यवृत्ती प्रदान केली जाणार आहे. अर्ज करण्याची अंतिम मुदत २५ जुलै आहे.

अल्प उत्पन्न गटातील आणि उपेक्षित समाजातील पदवीपूर्व स्तरावरील मुलींना तीन महिन्यांसाठी १० हजार रुपये प्रति महिना, पदव्युत्तर स्तरावरील मुलींना पंधरा हजार रुपये प्रति महिना शिष्यवृत्ती दिली जाईल.

तर उद्योजक महिलांसाठी साडेसहा लाखांपर्यंत अनुदान आणि सहा महिन्यांसाठी १५ हजार रुपये प्रति महिना या प्रमाणे शिष्यवृत्ती दिली जाईल, अशी माहिती पीकेसीच्या मुख्य कार्यकारी अधिकारी डॉ. प्रिया नागराज यांनी दिली.

पीकेसीने बीएएसएफ केमिकल्स या कंपनीबरोबर केलेल्या सामंजस्य कराराअंतर्गत विज्ञान आणि तंत्रज्ञानाच्या क्षेत्रात महिलांना प्रोत्साहन देण्यासाठी गेल्यावर्षी रसायनशास्त्र आणि संबंधित क्षेत्रातील पदवीपूर्व, पदव्युत्तर स्तरावरील विद्यार्थी आणि उद्योजक महिलांसाठी शिष्यवृत्ती सुरू करण्यात आली.

गेल्यावर्षी आलेल्या २५० अर्जांतून सात पदवीपूर्व विद्यार्थिनी, दहा पदव्युत्तर विद्यार्थिनी आणि उद्योजिका विभागातून चार पीएच.डी. विद्यार्थिनींना शिष्यवृत्ती देण्यात आली. शिष्यवृत्तीप्राप्त विद्यार्थिनी, उद्योजक महिलांना आवश्यक मार्गदर्शन, संस्था-तज्ज्ञांच्या भेटी अशा स्वरुपात मदत केली जाईल, असे डॉ. नागराज यांनी सांगितले.

अधिक माहिती व पात्रतेसाठी - https://www.pkc.org.in/