पिंपरी - ‘शहरातील मॉल परिसरातील वाहतूक कोंडीचे सर्वेक्षण करून त्याबाबतचा अहवाल तातडीने सादर करावा,’’ अशा सूचना पोलिस आयुक्त आर. के. पद्मनाभन यांनी अधिकाऱ्यांना दिल्या आहेत. 

चिंचवडगावातील वाहतूक विभागाच्या मुख्यालयाचे उद्‌घाटन सोमवारी (ता. १९) त्यांच्या हस्ते झाले. त्यानंतर वाहतूक नियोजनासंदर्भात अधिकाऱ्यांना त्यांनी सूचना दिल्या. 

याबाबत पत्रकारांशी बोलताना ते म्हणाले, ‘‘शहरातील अनेक मॉलसमोरील रस्त्यावर अस्ताव्यस्त वाहने उभी केलेली असतात. त्यामुळे वाहतूक कोंडीचा होते. यावर तोडगा काढण्यासाठी तेथील कोंडीचे सर्वेक्षण करून त्यानुसार नियोजन केले जाणार आहे.’’ 

ते म्हणाले, ‘‘शहरातील वाहतूक नियोजनात सुधारणा करण्यासाठी विविध उपाययोजना राबविल्या जात आहेत. विरुद्ध दिशेने येणाऱ्या वाहनचालकांमुळे समोरील वाहनचालकास धोका पोचू शकतो. त्यामुळे विरुद्ध दिशेने वाहन चालविणाऱ्यांवर कारवाई केली जात आहे. बेशिस्त वाहनचालकांवर कारवाई करणारे अधिकारी, कर्मचाऱ्यांना बक्षीस जाहीर केले आहे. कोंडी टाळण्यासाठी सिग्नलच्या वेळेत वाहतुकीनुसार बदल केले आहेत. त्यामुळे वाहतूक सुरळीत राहण्यास मदत होत आहे. अनेक ठिकाणी रस्त्यावरील अतिक्रमणांमुळे कोंडीचा प्रश्‍न निर्माण होतो. अतिक्रमणे रोखण्यासाठी ठोस पावले उचलणे गरजेचे आहे. सध्या मनुष्यबळाची कमतरता आहे. त्यामुळे कमी मनुष्यबळात काम करावे लागते. पुढील काळात अधिक सुधारणा होतील.’’