ओझर : ता.जुन्नर परिसरात शुक्रवारी सायंकाळच्या वेळी अवकाळी पावसाने हजेरी लावली.त्यामुळे गव्हू,हरभरा,काढणीसाठी आलेला कांदा या पिकांचे मोठया प्रमाणावर नुकसान झाले आहे.कापणी करून शेतात वाळत असलेली पिके भिजली असून उभ्या पिकांलाही चांगलाच फटका बसला आहे तसेच शेतातील इतर पिकांचेही नुकसान झाल्याचे पहावयास मिळते.

निसर्गाच्या लहरीपणामुळे शेतमालांचे मोठ्या प्रमाणावर नुकसान झाल्याने हवालदिल झालेल्या शिरोली खुर्द (ता.जुन्नर) येथील अजित मोरे शेतकऱ्याने चक्क कवितेच्या माध्यमातून आपली कैफियत मांडली आहे.त्यांची हि कविता सध्या सोशियल मिडियावर व्हायरल होत असून त्याची चांगलीच चर्चा सुरू आहे.स्वतःच्या शेतमालाचे पावसाने नुकसान होत असताना,हाता तोंडाशी आलेला घास अवकाळीने हिरावून घेत असताना कवी मनाच्या शेतकऱ्याला कविता सुचते यातूनच शेतक्याचे मन किती मोठे असते आणि शेतकरी किती धिराचा असतो याची प्रचिती येते.

"हरभरा "

कैक वर्ष होते ऊस कांदे

म्हणलं बदली करु बिवड

पीक यायचे झाले वांदे

मग हरभऱ्याची केली निवड

माती परीक्षण करून पाहिले

पिकांचे शास्त्र आहे यापाठी

मातीत अन्नघटक नाही राहिले

हरभरा मुळावर असतात गाठी

आज चार महिने झाले

पेरला वावरात हरभरा

सर्व पाणी भरून झाले

मोड आले वर तरातरा

काबुली मिळाला औंदा वाण

त्याचे नांव होते डॉलर

पीक आले एकदम छान

टाईट झाली माझी कॉलर

आयाबायांनी खुडली भाजी

फांदी फांदीला झाला फुटवा

तोही मग झाला वाढीला राजी

मस्त भरगच्च झाला ताटवा

खता औषधांचा केला मारा

पाणी भरले रात्री पहाटे

ढवळ्या रंगाचा आला फुलोरा

पानापाना आड भरले घाटे

मित्र आले,गणगोत आले

मस्त केली हुळा पार्टी

हुळा खाऊन सर्व खुष झाले

खुष झाली पोरं कार्टी

सगळे घाटे झाले पिवळे

एकही नाही राहिला हिरवा

काढायला पक्व झाले सगळे

झाला करडा नच राही गारवा

पहिल्यावानी व्हत नाही काम

फाट्यावरून मजूर आणले मोलाने

गड्यांना मोजाया लागतं दाम

मजूरच हालाना काही केल्याने

हरभरा याटाळून घातली कडपं

थोडा तापून म्हणलं करून टाकू

अवकाळीने घातलीच झडप

तो आल्यावर कोणतं कडीप झाकू!

-अजित मोरे,शिरोली खुर्द : 7588034507