सिंहगड रस्ता : कारच्या इंजिनमध्ये बिघाड झाल्याने अचानक रस्त्यात कार पेटली मात्र सुदैवाने जीवित हानी टळली. याबाबत अधिक माहिती अशी की, एम एच 43 ए 110 होंडा सिटी कार हिंगण्याकडून धायरीच्या दिशेने निघाली होती. भा द खेर आनंदनगरच्या चौकात कार आली असता. सिग्नल ला चौकात गाडी थांबली होती त्यावेळी, अचानक कारच्या इंजिन मधून धूर येण्यास सुरुवात झाली. क्षणार्धातच कारने पेट घेतला. आजूबाजूच्या दुकानांनी उपलब्ध साहित्य तसेच पाणी टाकून कार विझवण्याचा प्रयत्न केला. दरम्यान अग्निशमन दलास कळविण्यात आले. आनंद नगर येथील अग्निशमन दलाचे जवान घटनास्थळी उपस्थित होऊन त्यांनी त्वरित आग विझवली. अग्निशमन दलाच्या जवानांनी कटावणीच्या साह्याने बॉनेट उघडून आग विझवली. (Pune News)

नईम काझी यांची ती कार होती. ते स्वतः गाडी चालवत होते. सुदैवाने ते यातून बचावले. आग विझविण्यासाठी अग्निशमन दलाचे सिंहगड रस्ता केंद्राचे प्रमुख प्रभाकर उमराटकर फायरमन सतीश टाकवे, संजीव चव्हाण, राजेश वाझे, संदीप पवार आणि चालक क्षीरसागर यांनी कारला लागलेली आग विझवण्याची कामगिरी बजावली. या घटनेत कारचे नुकसान झाले आहे.