पुणे - शहराच्या वेगवेगळ्या भागातुन वाहणाऱ्या मुठा डावा कालव्यात (Mutha Left Canal) मंगळवारी तीन मृतदेह (Deathbody) आढळून खळबळ उडाली. अग्निशामक दलाच्या जवानांनी तीनही मृतदेह बाहेर काढून शवविच्छेदन करण्यासाठी ससून रुग्णालयात पाठविले असून त्यांची अद्याप ओळख पटलेली नाही. (Three Bodies were Found in a Canal in Different Parts of Pune on Tuesday)

याप्रकरणी हडपसर, दत्तवाडी व सिंहगड रोड पोलिस ठाण्यात याची नोंद करण्यात आली आहे. हडपसर येथे शिंदे वस्ती परिसरात असलेल्या कालव्यात एक मृतदेह तंरगत असल्याची माहिती अग्निशमन दल व पोलिसांना मिळाली होती. त्यानंतर जवानांनी मृतदेह बाहेर काढला आहे. त्याची अद्याप ओळख पटलेली नाही. मृत व्यक्तिचे वय 35 ते 40 असून हडपसर पोलिसांकडून ओळख पटविण्यात येत आहे.

 जनता वसाहतीमधील कालव्यामध्ये देखील एका व्यक्तीचा मृतदेह आढळून आल्याचा प्रकार समोर आला आहे. मंगळवारी सकाळी ही माहिती मिळाल्यानंतर अग्निशमन दलाच्या जवानांनी तेथील मृतदेह बाहेर काढला आहे. त्याची ओळख पटलेली नाही. तीन ते चार दिवसांपूर्वीचा हा मृतदेह असण्याची शक्यता आहे. दत्तवाडी पोलीस ओळख पटविण्याचे काम करत आहेत.

दरम्यान, सिंहगड रोड भागातील वडगाव येथील कालव्यात ही एका अनोळखी व्यक्तीचा मृतदेह आढळला आहे. त्याचीही ओळख पटली नसून त्याबाबत सिंहगड रोड पोलिस तपास करत आहेत. सकाळी हा प्रकार समोर आल्यानंतर अग्निशमन दल व पोलिसांनी धाव घेतली आहे.