पुणे : हडपसर परिसरातील एका लॉजमध्ये सुरू असलेल्या वेश्‍याव्यवसायावर सामाजिक सुरक्षा विभागाने छापा टाकून दोन अल्पवयीन मुलींसह एका तरुणीची सुटका केली. याप्रकरणी पोलिसांनी दोघांना अटक केली आहे. 

दलाल शबाना दखनी (वय 30, रा. शिवनेरीनगर, कोंढवा) व लॉजचा व्यवस्थापक यासीन इब्राहिम साहेब (वय 36, मूळ रा. उडपी, कर्नाटक) असे अटक केलेल्या संशयित आरोपींची नावे आहेत. 

हडपसर भागातील हांडेवाडी येथील सौरभ संगम लॉजमध्ये अल्पवयीन मुलींकडून वेश्‍याव्यवसाय करवून घेतला जात असल्याची माहिती रेस्क्‍यू फाउंडेशनने सामाजिक सुरक्षा विभागाला दिली होती. त्यानंतर विभागाच्या पथकाने शुक्रवारी सायंकाळी या लॉजवर छापा घातला. त्या वेळी तेथे दोन अल्पवयीन मुली व एक तरुणी आढळून आली. पथकाने त्यांची सुटका केली. अल्पवयीन मुलींना शबाना ही वेश्‍याव्यवसाय करण्यास प्रवृत्त करत असल्याचे पोलिस तपासात उघडकीस आले. 

सहायक आयुक्त भानुप्रताप बर्गे यांच्या मार्गदर्शनाखाली सामाजिक सुरक्षा विभागाच्या पोलिस निरीक्षक मनीषा झेंडे, पोलिस निरीक्षक सुनील तांबे, सहायक निरीक्षक अनिता खेडकर, उपनिरीक्षक योगिता कुदळे, नामदेव शेलार, राजाराम घोगरे, प्रमोद म्हेत्रे, नितीन लोंढे, कविता नलावडे, गीतांजली जाधव, सुप्रिया शेवाळे, अनुराधा ठोंबरे यांच्या पथकाने ही कारवाई केली.