पिरंगुट : पुणे कोलाड महामार्गावरील लवळे फाटा (ता.मुळशी) येथील आज सायंकाळी सहा वाजण्याच्या सुमारास दोन ट्रकचे ब्रेक फेल झाल्याने तीन जणांचा मृत्यू झाला. मृत्यू झालेल्यांमध्ये दोन महिला व नऊ महिन्यांच्या चिमुकल्याचा समावेश आहे. या अपघातात सहाजण जखमी झाले असून एकाची प्रकृती गंभीर आहे. येथील लवळे फाट्यावर फरशीने भरलेला ट्रक पौडच्या दिशेने जात होता. त्याच्या पुढे दोन दुचाकी व एक चारचाकी अशी तीन वाहने प्रवाशांसह जात होती. ट्रकचे ब्रेक फेल झाल्याने समोरील तन वाहनांना ट्रकने जोरदार ठोकर दिली. त्यावेळी पुढील बाजूस सीबीझेड या दुचाकीवर बाळासह चाललेले दांपत्यांना जोरदार ठोकरल्याने बाळ व आईचा जागीच मृत्यू झाला आहे.

अन्य दुसऱ्या दुचाकीवरील एका महिलेला उपचारासाठी हॅास्पीटलमध्ये दाखल करताना मृत्यू झाला आहे. रेश्मी पवन पटेल (वय ३० ) व रिहान पवन पटेल ( वय ९ महिने) यांचा जागीच मृत्यू झाला असून दवाखान्यातील मृत्यू झालेल्या महिलेचे नाव समजू शकलेले नाही. पोलिस घटनास्थळी तातडीने दाखल झाले असून वाहतूक पोलिस राजेश गायकवाड व त्यांचे सहकारी जखमींना मदत करून वाहतूक सुरळीत करीत आहेत.