दौंड : दौंड नगरपालिकेच्या साठवण तलावात बुडून तीन युवकांचा मृत्यू झाला आहे. साठवण तलाव व परिसरात फोटोशूट करण्यासाठी हे युवक गेले होते.असरार अब्दूल अलीम काझी (वय २१), करीम अब्दूल हादी काझी (वय २०) व अतिक उझजमा फरीद शेख (वय २०, तिघे रा. नवगिरे वस्ती, नगर मोरी, दौंड) अशी त्यांची नावे आहेत. ६ मार्च रोजी दुपारी चार वाजता तिघे एका दुचाकीवर दौंड - कुरकुंभ राष्ट्रीय महामार्गालगत असलेल्या नगरपालिका साठवण तलाव परिसरात फोटोशूट करून पोहण्यासाठी गेले होते.

रात्री उशिरापर्यंत ते घरी परत न आल्याने कुटुंबीयांनी शोध घेतला असता ते पोहण्यासाठी गेल्याची माहिती मिळाली. नातेवाईक व मित्रमंडळींनी साठवण तलाव परिसरात पाहणी केली असता त्यांची दुचाकी व कपडे आढळून आल्याने पाण्यात शोध घेतला असता त्यांचे मृतदेह गाळात अडकले होते.तिघांचे मृतदेहांचे दौंड उप जिल्हा रूग्णालयात विच्छेदन करण्यात आले आहे.मृत असरार व करीम काझी हे सख्खे चुलतभाऊ असून अतिक शेख हा त्यांचा शेजारी राहणारा मित्र होता. असरार हा कला शाखेचा पदवीधर असून करीम आणि अतिक हे संगणक विज्ञान शाखेचे विद्यार्थी आहेत.