पुणे - रेल्वेच्या तिकिटासाठी आता रांगेत उभे राहण्याची गरज नाही. स्थानकापासून पाच किलोमीटर अंतरावरूनही तुम्हाला हव्या त्या गाडीचे किंवा लोकलचे अनारक्षित तिकीट मोबाईलवर ‘यूटीएस’ (अनरिझर्व्हड तिकिटिंग सिस्टीम) या ‘ॲप’द्वारे मिळणार आहे. त्याची प्रिंटआउटही काढण्याची गरज नसेल, असे प्रशासनाने स्पष्ट केले आहे. या सेवेला प्रवाशांकडून मिळणारा प्रतिसाद दिवसेंदिवस वाढत आहे.

ताज्या बातम्यांसाठी डाऊनलोड करा ई-सकाळचे ऍप

‘यूटीएस ॲप’द्वारे मोबाईलवरून रेल्वे गाडीचे तिकीट देण्याची यंत्रणा प्रशासनाने ४ एप्रिल २०१८ रोजी पुण्यात सुरू केली. सुरुवातीला या ‘ॲप’मधून फक्त लोकलचे तिकीट मिळत होते. त्यानंतर अवघ्या सहा महिन्यांतच म्हणजे ऑक्‍टोबरपासून रेल्वेच्या सर्व गाड्यांचे तिकीट या ‘ॲप’मधून प्रवाशांना मिळणे शक्‍य झाले. सुरुवातीला प्रवाशांना रेल्वे स्थानकापासून दोन किलोमीटर अंतरावरून तिकीट मिळत असे. आता ही सुविधा पाच किलोमीटरपर्यंत वाढविण्यात आली आहे. त्यामुळे घरापासून निघालेल्या प्रवाशाला रेल्वे स्थानकापर्यंत पोचण्यापूर्वीच हातात तिकीट मिळू शकते. एखाद्या प्रवाशाकडे रेल्वेचे आरक्षण नसल्यास या ‘ॲप’द्वारे तिकीट काढून तो प्रवास करू शकतो. तसेच, आरक्षण आणि तिकिटामधील फरकाची रक्कम तिकीट तपासनिसाकडे जमा करून तो आरक्षणही मिळवू शकतो, अशी माहिती रेल्वेच्या पुणे विभागाचे जनसंपर्क अधिकारी मनोज झंवर 
यांनी दिली.