आकुर्डी : "आमचे आमदार , नगरसेवक आमच्या ताब्यात कसे राहतील हे पाहण्यासाठी आम्ही सर्वजण समर्थ आहोत. आमच्यातील जे चार जण पक्ष सोडून गेले त्यांना कसा पश्चाता होईल हे लवकरच समजेल. आगामी महापालिका निवडणुकीत आम्हाला हरविणे सोपे नाही", असा विश्वास भाजपचे प्रदेशाध्यक्ष चंद्रकांत पाटील यांनी व्यक्त केला. तसेच एका महापालिकेच्या निवडणूकीमधे लक्ष लक्ष घालण्याची वेळ उपमुख्यमंत्री असणा-या अजित पवारांवर आली असल्याची टीकाही त्यांनी केली.

पिंपरी चिंचवड शहरातील रावेत येथे एका भूमिपूजन कार्यक्रमासाठी शनिवारी सकाळी ते आले होते. यावेळी पत्रकारांशी ते बोलत होते. सध्या बहुचर्चित असलेल्या आर्यन खान ड्रग प्रकरणाबद्दल ते म्हणाले "शाहरुख खानच्या मुलाचा एवढा पुळका का ? महाराष्ट्रामध्ये दररोज चार महिलांवर अन्याय, अत्याचाराचा घटना घडतात, शेतकऱ्यांचे प्रश्न, अतिवृष्टी त्याकडे महाराष्ट्र सरकार केव्हा तत्परतेने पाहणार?

जरंडेश्वर सहकारी साखर कारखाना आणि त्यामार्फत करण्यात आलेले व्यवहार याबद्द्ल पाटील यांनी ते ६४ कारखाने कमी किमतीत का विकले गेले याची चौकशी राज्य सरकारने करावी अशी मागणीही केली. राष्ट्रीय स्वयंसेवक संघ भाजपला ताब्यात ठेवत नाही, पण आम्ही त्यांच्यापासून प्रेरणा घेतो, असेही ते म्हणाले