बारामती, ता. ११ : कोविडच्या रुग्णांचा आकडा बारामतीत झपाट्याने वाढत असून, नागरिकांनी पुरेशी काळजी घेण्याचे आवाहन प्रशासनाने केले आहे. गेल्या चोवीस तासात बारामतीत तब्बल ४५ रुग्ण आढळले असून, हा वेग कमालीचा आहे. यातही बारामती शहरात ३०; तर तालुक्यात १५ रुग्ण आढळले आहेत. शहरात गर्दीचे प्रमाण अधिक असून, लोक पुरेशी काळजी घेत नसल्याने रुग्ण वाढ मोठी आहे.
तालुक्यातील तीन कुटुंबातील तब्बल बारा जण पॉझिटिव्ह असून, शहरातही कुटुंब बाधित होताना दिसत आहेत. बाधित होणाऱ्यांची संख्या अधिक असली; तरी रुग्णालयात जाण्याची गरज फक्त पाच टक्के रुग्णांनाच लागते असल्याने ती एक दिलासादायक बाब असल्याची माहिती तालुका आरोग्य अधिकारी डॉ. मनोज खोमणे यांनी दिली.
राज्यात मोठ्या संख्येने कोरोना रुग्णांची संख्या वाढताना दिसत असली; तरी अजूनही बारामतीत लोक फारशी काळजी घेताना दिसत नाहीत. जमावबंदी बारामतीत फक्त कागदावरच आहे. अनेक ठिकाणी घोळक्याने लोक बिनधास्त एकत्र वावरत आहेत. बँकासह इतर अनेक संस्थांतून मोठी गर्दी उसळते आहे. पोलिसांची गस्त सातत्याने राहणे गरजेचे असून, जेथे गर्दी होत असेल तेथून गर्दी कमी करण्याचे काम होण्याची गरज आहे.
बारामतीत प्रशासनाने कोविड केअर सेंटर सुरु करण्यासह इतरही जय्यत तयारी केलेली असली; तरी काळजी घेऊन कोरोनाची बाधा होणार नाही, याकडे अधिक लक्ष देण्याची गरज निर्माण झाली आहे. गर्दीची ठिकाणे निश्चित करून संबंधितांना समज देणे, प्रसंगी कारवाई करण्याची गरज आहे. प्रशासनाने याबाबत समन्वय साधून नगरपालिका, पोलिस, आरोग्य व इतरही विभागांच्या समन्वयाने काम होण्याची गरज आहे. विनामास्क फिरणाऱ्यांवर मोठ्या प्रमाणात कारवाई व्हायला हवी व अँटीजेन तपासण्यांचीही संख्या वाढविण्यावर भर दिला जावा, अशीही मागणी जोर धरू लागली आहे.