पुणे, ता. १० : बजाज फायनान्स कंपनीचे संजीव बजाज यांच्यासह वरिष्ठ अधिकाऱ्यांना कंपनीचा डाटा हॅक करण्याची धमकी देऊन खंडणी मागण्याचा ईमेल कंपनीला प्राप्त झाला होता. याप्रकरणी कंपनीकडून पोलिसांकडे तक्रार देण्यात आली आहे. त्याचबरोबर कंपनीची संगणक प्रणाली व कामकाज पूर्णपणे सुरक्षित आहे. त्यावर कोणत्याही प्रकारचा परिणाम झाला नाही, असे बजाज फायनान्स कंपनीने स्पष्ट केले आहे.
कंपनीच्या काही वरिष्ठ अधिकाऱ्यांना धमकीचे ईमेल आले होते. त्याची गांभीर्याने दखल घेऊन व सावधगिरीचा उपाय म्हणून कंपनीने या फिशिंग ईमेलप्रकरणी पोलिसांत तक्रार दाखल केली आहे. पुढील कारवाईसाठी संबंधित अधिकाऱ्यांसोबत कंपनीकडून सहकार्य केले जात आहे. या घटनेमुळे कंपनीच्या प्रणालीवर किंवा कामकाजावर, सुरक्षेवर कोणताही विपरीत परिणाम होणार नाही. आपल्या सर्व प्रणाली सुरक्षित आहेत, असे कंपनीने स्पष्ट केले आहे.