आंबेठाण, ता. १६ : शिवे (ता. खेड) येथील ज्ञानदीप विद्यालयात २२ वर्षांपूर्वी दहावीत शिकत असलेल्या विद्यार्थ्यांचा स्नेहमेळावा पार पडला. विद्यालयाच्या सभागृहामध्ये १९९९-२००० या शैक्षणिक वर्षात दहावीमध्ये शिकत असलेल्या विद्यार्थ्यांचा पुन्हा एकदा वर्ग भरवण्यात आला. तत्कालीन दहावीच्या वर्गातील ३५ पैकी २८ माजी विद्यार्थी या वेळी उपस्थित होते.
स्नेहमेळाव्याच्या अध्यक्षस्थानी विद्यालयाचे मुख्याध्यापक धनंजय भांडवलकर होते तर प्रमुख पाहुणे म्हणून तत्कालीन दहावीच्या बॅचचे वर्गशिक्षक राजेंद्र पारवे उपस्थित होते.
या स्नेहमेळाव्यात सर्वांनी मनोगते व्यक्त करीत स्वतःचा परिचय करून दिला. तर काहींनी कविता, गवळण गायन करून कार्यक्रमात रंगत आणली. शिक्षकांनीही या वेळी मनोगत व्यक्त केले.
२२ वर्षांनंतर होणाऱ्या या स्नेहमेळाव्यासाठी राहुल देशमुख, डॉ. संदीप शिवेकर, सत्यवान गडदे, शंकर गडदे, बाळासाहेब शिवेकर यांनी सहकार्य केले. आभार माजी विद्यार्थी महेश घाडगे यांनी मानले.