आंबेठाण, ता.२१ : पहिल्या श्रावणी सोमवारनिमित्त तीर्थक्षेत्र भामचंद्र डोंगर (ता.खेड ) येथे भगवान भामचंद्र अर्थात महादेवाच्या दर्शनासाठी भाविकांनी मोठ्या प्रमाणात गर्दी केली होती. संत तुकाराम महाराज यांची साक्षात्कार भूमी म्हणून देखील हा डोंगर परिचित आहे.
पहाटे पाच वाजल्यापासून भाविकांची डोंगरावर गर्दी झाली होत आहे. मंदिरात भाविकांकडून ''श्रीं''ना अभिषेक करण्यात आला. येथे डोंगर कपारीत कोरलेल्या गुहेत महादेवाचे मंदिर असून, बाहेर गाभारा आणि आत पिंड आहे. याशिवाय बाहेर असणाऱ्या गाभाऱ्यात नंदीसह अन्य देवदेवतांच्या मूर्ती आहेत.
भामचंद्र डोंगर सप्ताह समिती आणि लोकप्रतिनिधी यांच्या माध्यमातून या ठिकाणी विविध सुविधा उपलब्ध करून दिल्या आहे. डोंगराच्या पायथ्याला असणाऱ्या मारुती मंदिर परिसरात भाविकांसाठी चांगल्या सुविधा उपलब्ध करून दिल्या आहेत. यात पिण्याचे पाणी, सभागृह, स्वच्छतागृह आदींचा समावेश आहे.
या ठिकाणी पंचक्रोशीतील भाविकांसह राज्यातून भाविक येत असतात. महादेव मंदिर, संत तुकाराम महाराज ध्यानधारणा करीत असलेल्या ठिकाणासह कोरीव लेण्या येथे पाहता येतात. या शिवाय डोंगराच्या पलीकडे भामा आसखेड धरण आणि पश्चिम भागात सह्याद्रीच्या डोंगररांगेत धबधबे असल्याने या भागात पर्यटन देखील करता येते.

02757