आंबेठाण, ता. १५ : खेड, शिरूरसह पुणे शहराच्या पूर्व भागाला वरदान ठरलेल्या भामा आसखेड (ता.खेड) धरणात गुरुवार (ता. १५ ) १५.०९ टक्के पाणीसाठा शिल्लक आहे. मागील वर्षीच्या तुलनेत हा साठा जवळपास पाच टक्क्यांनी कमी आहे. मागील वर्षी आजच्या तारखेला धरणात २०.२५ टक्के पाणीसाठा शिल्लक होता.
भामा आसखेड हे खेड तालुक्यातील पश्चिम भागात भामा नदीवर उभारलेले मातीचे धरण आहे. धरणाची पाणी साठवण क्षमता ८.१४ टीएमसी इतकी आहे. धरणात सध्या एकूण पाणीसाठा हा १.६३ टीएमसी असून उपयुक्त पाणीसाठा हा १.१६ टीएमसी इतका आहे. मागील वर्षी आजच्या तारखेला धरणात २०.२५ टक्के पाणीसाठा होता.

मागील ३० दिवसांपासून नदीपात्रात आयसीपीओ मधून १२०० क्युसेक वेगाने उन्हाळ्यातील दुसरे आवर्तन सुरू होते. दरम्यान, ३० दिवस सुरू असलेल्या या आवर्तनातून आलेगाव पागापर्यंत असणारे १८ बंधारे आणि त्यापुढील दौड तालुक्यातील ६ बंधारे भरण्यात आले होते.
धरणातून पुणे शहराच्या पूर्व भागासह तीर्थक्षेत्र आळंदीला पाणीपुरवठा केला जात आहे. या धरणातून पुढील काळात पिंपरी-चिंचवड शहराला पाणीपुरवठा सुरू होणार आहे. पिंपरी चिंचवड करिता भामा आसखेड धरणातून २.१४ टीएमसी पाणीसाठा देण्यात येणार आहे.

पाणी जपून वापरण्याचे आवाहन
आगामी पावसाचे प्रमाण माहीत नसल्याने आणि पाण्याची वाढती मागणी लक्षात घेता पाणी जपून वापरावे, असे आवाहन सहाय्यक अभियंता (श्रेणी १) अश्विन पवार, शाखा अभियंता नीलेश घारे-देशमुख, कालवा निरीक्षक वसंत ढोकरे यांनी केले आहे.

06388