आंबेठाण, ता. २३ : शिंदेगाव (ता. खेड) येथे माजी सैनिक दत्तात्रेय टेमगिरे यांनी त्यांच्या चार मजली इमारतीवर छत्रपती शिवाजी महाराजांचा भव्य अश्वारूढ पुतळा उभारला आहे. त्यांच्या या शिवप्रेमाचे समाजात आणि विशेषतः सोशल मीडियामध्ये कौतुक केले जात आहे.
टेमगिरे हे भारतीय सैन्य दलातील निवृत्त सैनिक असून, परखड स्वभाव आणि प्रचंड देशभक्ती, अशी त्यांची ओळख आहे. तसेच, ते खेड तालुका खरेदी विक्री संघाचे उपाध्यक्ष म्हणून देखील कार्यरत आहेत. शिवरायांचा अश्वारूढ पुतळा उभारण्यासाठी त्यांना जवळपास चार लाख रुपयांचा खर्च आला आहे.
यावेळी माजी सैनिक दत्तात्रेय टेमगिरे म्हणाले, ‘‘छत्रपती शिवाजी महाराज हे केवळ इतिहासकालीन व्यक्ती नव्हते, तर त्यांचे विचार आजही सर्वांसाठी आदर्शवत आहेत. पुढील काळात जो कोणी छत्रपती शिवाजी महाराजांचा हा पुतळा पाहिल, त्यावेळी त्यांना महाराजांचे नेतृत्व, शौर्य याची आठवण होऊन त्यातून प्रेरणा मिळेल.’’

03559, 03560