आंधळगाव, ता. ३ : कुरुळी (ता. शिरूर) येथील जिल्हा परिषद प्राथमिक शाळेतील पहिली ते सातवीच्या विद्यार्थ्यांनी शाळेच्या आवारात शनिवारी (ता. २४) बाल आनंदी बाजार भरविला. विद्यार्थ्यांच्या कलागुणांना वाव मिळावा व त्यांचे आर्थिक ज्ञान वाढण्यासाठी ज्ञानरचनावाद उपक्रम म्हणून शाळेत बाल आनंदी बाजार भरविण्यात आला होता.
विविध प्रकारचा भाजीपाला, किराणा मालाचे दुकान, स्टेशनरी, बिस्किटे, सामोसे, वडे, पाणीपुरी, इडली सांबर, चहा, लस्सी, बासुंदी अशा खाद्यपदार्थांची दुकाने विद्यार्थ्यांनी थाटली होती. कार्यक्रमाचे उद्‍घाटन उपसरपंच श्याम हरिहर यांच्या हस्ते झाले. याप्रसंगी अध्यक्ष राहुल बोरकर, उपाध्यक्ष शारदा ढवळे, प्रतिभा बोरकर, ज्योती बोरकर, अश्विनी बोरकर, लक्ष्मी रणदिवे, पालक व ग्रामस्थ उपस्थित होते. विद्यार्थ्यांचे व्यवहार कौशल्य, नम्रता, संभाषण, आत्मविश्वास, गणन क्रिया, धीटपणा या गुणांचा विकास व्हावा. तसेच संतुलित आहाराविषयी विद्यार्थ्यांना माहिती व्हावी, या साठी हा आनंदी बाजार भरविण्यात आला होता, असे शाळेचे मुख्याध्यापक जालिंदर दुर्गे यांनी सांगितले.
आनंदी बाजारात २५ हजारांची उलाढाल झाली. ग्रामस्थ आणि पालक यांनी खरेदी करून विद्यार्थ्यांचा आनंद द्विगुणित केला. या उपक्रमासाठी मुख्याध्यापक जालिंदर दुर्गे, कैलास लंघे, भाऊसाहेब दुर्गे, दयाराम बर्वे, संगीता पोटे, वैशाली बेंद्रे, अलका गाडेकर यांनी मुलांना मार्गदर्शन केले.

ADL24A00850